مەشىتتەردە جينالعان قاراجات قايدا جۇمسالادى - باس مۇفتي جاۋابى

استانا. قازاقپارات - ورتالىق كوممۋنيكاتسيالار قىزمەتىندە وتكەن بريفينگىدە قازاقستان مۇسىلماندارى ءدىني باسقارماسىنىڭ ءتوراعاسى، باس مۇفتي ناۋرىزباي قاجى تاعان ۇلى ءپىتىر ساداقادان مەشىتتەرگە جينالعان اقشا قايدا جۇمسالاتىنىن ءتۇسىندىردى، دەپ حابارلايدى قازاقپارات ءتىلشىسى.

«جالپى ءپىتىر ساداقاسى ءار مەشىتكە جەكە-جەكە تۇسەدى. ءبىر جەرگە عانا تۇسپەيدى عوي. قازاقستاندا قازىر 2700 دەن استام مەشىت بار. تۇرعىندار وزدەرى تۇرىپ جاتقان جەردەگى مەشىتتەرگە جەكە-جەكە بەرەدى. ارينە، ءبىر قالاعا نەمەسە مەشىتكە قاتىستى مالىمەت كەرەك بولسا، ونىڭ ەسەبىن كورۋگە بولادى جانە سۇراعان ادامدارعا بەرۋگە دە بولادى. نايب ءمۇفتي سانسىزباي قۇربان ۇلى ايتىپ كەتكەندەي، تۇسكەن ساداقالار جىل بويى مۇقتاج جاندارعا بەرىلىپ وتىرادى»، - دەدى باس ءمۇفتي ب ا ق وكىلىنىڭ ساۋالىنا بەرگەن جاۋابىندا.

سونداي-اق ول مەشىتتەن كومەك سۇراپ كەلگەن ادامعا جاردەم بەرىلمەيتىن جايتتار سيرەك كەزدەسەتىنىن، ونىڭ ءوزى قارجىلىق مۇمكىندىكتەرمەن عانا بايلانىستى ەكەنىن ايتتى.

«ارينە كەي كەزدە جاعدايلار بولۋى مۇمكىن. كەي مەشىتتەردە مۇمكىندىگى بولماي، قاراجات ماسەلەسى بولۋى مۇمكىن. ءبىراق بۇل وتە از. ويتكەنى بىزدەگى ءار مەشىتتىڭ ءتىزىمى بار. ءبىر اۋىلدىڭ مەشىتى بولسا، سول اۋىلداعى جاعدايى تومەن وتباسىلاردىڭ ءتىزىمى مەشىتتە ساقتالادى. ولارعا ۋاقتىلى كومەكتەر بەرىلىپ تۇرادى»، - دەدى ناۋرىزباي قاجى تاعان ۇلى.