قازاق قانشا جىلقىسى بار ادامدى باي دەپ اتاعان؟
باي دەپ قازاق ادامنىڭ ءال-اۋقاتى جوعارى ادامدى عانا ەمەس، ءبىر رۋلى ەلدى باسقارىپ، سول ەلدىڭ تۇگەل ەكونوميكاسى، كوڭىل كۇيىنە اسەر ەتىپ وتىرعان ەرەكشە جانداردى اتاعان. ال ەندى تۋرا ماعىناسىنا كەلسەك، قازاق بايلىقتى قولداعى ۇساق مالمەن ەمەس، ءىرى قارا، ونىڭ ىشىندە جىلقى سانىمەن ولشەگەن.
5000 نان جوعارى جىلقىسى بار ادامدى باي ەسەبىنە جاتقىزعان. ورىس زەرتتەۋشىلەرى ەڭبەكتەرىندە ءوز جىلقىلارىنىڭ سانىن دا بىلمەگەن قازاقتاردىڭ بولعانىن جازادى. ايتالىق، «قوزى كورپەش - بايان سۇلۋداعى» باياننىڭ اكەسى قارابايدىڭ جىلقىلارى 90 مىڭنان اسىپ جىعىلعانى جازىلادى.
فرانسۋز عالىمى گۋتتەن چاپسكي «قازاقتاردىڭ جىلقى تابىندارى عالامات ۇلكەن، باي يەلىكتەرىندە 8-10 مىڭنان باستاپ جىلقى بولسا، كەدەيلەردىڭ وزىندە 20 دان كەم بولماعان» دەپ جازادى. ال ايگىلى شوقان جازبالارىندا ارعىن ىشىندەگى ساپاق بايدا 18 مىڭ، قارجاس ازنابايدا 25 مىڭ جىلقى بولعان دەگەن دەرەكتەر بار. وسىنداعى ساپاقتىڭ جىلقىلارىنان دا بولەك، تولىپ جاتقان تۇيەسى، مىڭعىرعان ۇساق مالى بولعان. ءجۇز شاقتى مالشى ۇستاعان ساپاق باي كوشكەندە 150 تۇيەگە جۇك ارتقانعا ۇقسايدى. ال الدا مەن جۇمان اتتى بايلاردا 23 مىڭ جىلقى بولىپتى.
