زەينەتاقى رەفورماسى: جاعداي شيەلەنىسە ءتۇستى
سەنبى كۇنى پاريجدىك دەمونسترانتتار «جالپىعا ورتاق ەڭبەك كونفەدەراتسياسى» كاسىپوداعىنىڭ ۇندەۋىمەن استانانىڭ وڭتۇستىگىندە جينالدى، بۇعان دەيىن پوليتسيا ەليسەي الاڭدارى مەن كەلىسىم الاڭىن قورشاپ العان بولاتىن.
AFP حابارلاعانداي، شەرۋگە شىققاندار ءتارتىپ بۇزعان - جارناما قالقاندارىن سوققىلاپ، قالدىق كونتەينەرلەرى مەن ۆەلوسيپەدتەردى ورتەگەن، جولدى جاۋىپ، كولىكتەر قوزعالىسىنا كەدەرگى كەلتىرگەن. «موند» گازەتىنىڭ اقپاراتى بويىنشا، ءتارتىپ ساقشىلارى ولاردى تاراتۋ ءۇشىن سۋ شاشىپ، كوزدەن جاس اعىزاتىن گاز قولدانعان.
سونداي-اق، پاريجدەگى قاقتىعىستار كەزىندە 60 تان استام ادام ۇستالعان. ەلدەگى اۋماعىنىڭ ۇلكەندىگى جاعىنان ءۇشىنشى قالا - ليوندا 36 ادامنىڭ قامالعانى ايتىلدى. وندا راديكالدار توبى جەرگىلىكتى اتقارۋشى ورگانداردىڭ ءبىرىنىڭ عيماراتىنا باسىپ كىرگەن. مۇلىكتى قيراتىپ، ورتالىق ەسىكتىڭ ماڭىن ورتەمەك بولعان.
قالا مەرى، «جاسىلدار» پارتياسىنىڭ وكىلى گرەگوري دۋسە شەرۋشىلەردىڭ بۇل ارەكەتىن ايىپتايدى، ءبىراق ول ەل باسشىلىعىنا دا سىن ايتادى.
«بيلىكتىڭ بۇل ادىلەتسىز رەفورمانى اسىعىس قابىلداۋىنا نەگىز جوق ەدى. كوشەدە دە، پارلامەنتتە دە جاعداي وتە شيەلەنىسىپ تۇر. بۇل - جۇرگىزىلىپ وتىرعان ساياساتتىڭ سالدارى»، - دەدى ول.
ستراسبۋرگ (شىعىس) پەن ليللدە (سولتۇستىك) دە مىڭداعان ادام ميتينگكە شىقتى. نانت، برەست جانە بوردو (باتىس) كوشەلەرىندە دە نارازىلىق اكسيالارى ۇيىمداستىرىلعان.
پارلامەنتتىڭ تومەنگى پالاتاسىندا ۇكىمەتكە سەنىمسىزدىك ۆوتۋمىن جاريالاۋ داۋىسقا سالىنباق،
ال، كاسىپوداقتار 23-ناۋرىزدا جالپىۇلتتىق ەرەۋىلگە شىقپاق، بۇل توعىزىنشى اكسيا بولادى.
ەسكە سالايىق، فرانسيادا ۇزاق ۋاقىت بويى زەينەتاقى رەفورماسىنا قارسى اۋقىمدى نارازىلىق شارالارى ءوتتى. ەل بويىنشا ميلليونعا جۋىق ادام، سونىڭ ىشىندە ءبىر عانا پاريجدە 300 مىڭ ادام كوشەگە شىقتى.
ساۋالنامالارعا سايكەس، فرانسيا تۇرعىندارىنىڭ %76 ى رەفورماعا قارسى بولعانىمەن، ەل بويىنشا مىڭداعان نارازىلىقتارعا قاراماستان، فرانسيا سەناتى داۋلى رەفورمانى قولدادى.
فرانسيا پرەمەر-ءمينيسترى ەليزابەت بورن زەينەتاقى جۇيەسىنە وزگەرىستەر ەنگىزۋ تۋرالى زاڭ جوباسىنىڭ پارلامەنتتە داۋىسقا سالىنباستان قابىلدانعانىن مالىمدەدى.
مۇنان سوڭ وپپوزيتسيا ۇكىمەتكە سەنىمسىزدىك ۆوتۋمىن جاريالايتىنىن حابارلادى.