شىمكەنتتە تاراعان سايلاۋ ۋچاسكەسىنىڭ حاتتامالىق قورىتىندىسى تۋرالى اقپارات - جالعان

None
شىمكەنت. قازاقپارات - سايلاۋ ۋچاسكەسىنىڭ حاتتامالىق قورىتىندىسى تۋرالى الەۋمەتتىك جەلىدە تاراعان اقپارات شىندىققا جاناسپايدى.

بۇل تۋرالى شىمكەنت قالالىق اۋماقتىق سايلاۋ كوميسسياسىنىڭ ءتوراعاسى قايىربەك قۇنانبايەۆ مالىمدەدى، دەپ حابارلايدى قازاقپارات ءتىلشىسى.

كەشەگى كۇنى شىمكەنت قالاسىنداعى سايلاۋ ۋچاسكەلەرىنىڭ بىرىندە داۋىس بەرۋ قورىتىندىسى تۋرالى حاتتامانىڭ الدىن الا دايىندالعانى تۋرالى اقپارات تاراعان بولاتىن. ءتىپتى، قاي دەپۋتاتتىڭ قانشا داۋىس العانى تۋرالى مالىمەت الەۋمەتتىك جەلىدە تاراپ كەتتى.

اقپاراتتىڭ جالعان ەكەندىگىن ايتقان شىمكەنت قالالىق اۋماقتىق سايلاۋ كوميسسياسىنىڭ ءتوراعاسى قايىربەك قۇنانبايەۆ ۆيدەو ۇندەۋ جاسادى.

«الەۋمەتتىك جەلىلەردە تارالىپ جاتقان سايلاۋ ۋچاسكەلەرىنىڭ قورىتىندى حاتتامالارى بويىنشا ۆيدەوروليكتەردىڭ شىندىققا جاناسپايتىندىعىن حابارلايمىن. ونداعى قۇجاتتار مىجىلعان جانە ەشقانداي قولتاڭبا مەن ءمور قويىلماعان. روليكتە كورسەتىلگەن مالىمەتتەر ارانداتۋ دەپ ەسەپتەيمىن. سايلاۋ ۋچاسكەسىندە ءتيىستى حاتتاماعا قوياتىن مورلەر سەيفتە سايلاۋ باستالعانعا دەيىن ساقتالادى. حاتتامالار تەك سايلاۋ قورىتىندىسىنا سايكەس تولتىرىلادى جانە ناتيجەسى جاريالانادى. اتالعان ماسەلەنى قۇزىرلى ورگان تەكسەرىپ قۇقىقتىق باعا بەرىلەدى»، - دەدى ول.

سوڭعى جاڭالىقتار