بۇل سايلاۋ جاڭا قازاقستاننىڭ باستاماسى - ابايدىڭ نەمەرە تۋىسى ماناتاي اقساقال

سەمەي. قازاقپارات - ۇلى اقىن اباي قۇنانباي ۇلىنىڭ نەمەرە تۋىسى ماناتاي تولعانبايەۆ سايلاۋدا داۋىس بەردى، دەپ حابارلايدى قازاقپارات ءتىلشىسى.

اباي وبلىسىنداعى اباي اۋدانىندا تۇراتىن 86 جاستاعى ماناتاي تولعانبايەۆ ق ر پارلامەنتى ءماجىلىسى مەن بارلىق دەڭگەيدەگى ءماسليحات دەپۋتاتتارىنىڭ كەزەكتەن تىس سايلاۋىنا قاتىسىپ، داۋىس بەردى.

«بۇل سايلاۋ جاڭا قازاقستان قۇرۋدىڭ باستاماسى. سول ءۇشىن سايلاۋعا ءبارىمىز قاتىسىپ جاتىرمىز. ەل كەلەشەگىنەن زور ءۇمىت كۇتەمىز. جاڭعىرۋ، جاڭارۋ كەزەڭى باستالىپ، حالىقتىڭ ءال-اۋقاتى، تۇرمىسى جاڭارادى دەپ سەنەمىز»، - دەيدى ۇلى اقىننىڭ نەمەرە تۋىسى ماناتاي اقساقال.

ايتا كەتەيىك، اباي وبلىسىندا بارلىعى 478 سايلاۋ ۋچاسكەسى جۇمىس ىستەپ تۇر. ءوڭىر بويىنشا سايلاۋشىلاردىڭ جالپى سانى - 416030 ادام. ونىڭ ىشىندە 2684 ءى - مۇگەدەكتىگى بار ادام. بارلىق سايلاۋ ۋچاسكەسىندە ولارعا ءتيىستى جاعداي جاسالعان.

ەسكە سالساق، وسىعان دەيىن سايلاۋ كۇنى شاڭىراق كوتەرگەن سەمەيلىك ەكى جاستىڭ داۋىس بەرگەنىن حابارلاعان ەدىك.