قار بارىسى، ديۆان باتىر، نيندزيا تاسباقالار - سايلاۋداعى ەرەكشە داۋىس بەرۋشىلەر
ساعات 14.00 گە دەيىن سايلاۋشىلاردىڭ %46,84 داۋىس بەرىپ ۇلگەرگەن. ولاردىڭ اراسىندا ەرەكشە وبرازىمەن ەستە قالعان تۇرعىندار دا بار، دەپ حابارلايدى قازاقپارات ءتىلشىسى.
ماسەلەن قونايەۆ قالاسىنىڭ تۇرعىنى نۇربەك ورمانوۆ سايلاۋعا وبلىس ورتالىعىنىڭ باس بەلگىسىنە اينالعان بارىستىڭ كوستيۋمىن كيىپ كەلگەن.
«ەگەمەندى ەل ەرتەڭى جاستاردىڭ قولىندا، ءبىز جاستار ۇشقىر ويلى، جاسىنداي جارقىلداپ تياناقتى ەڭبەك ەتسەك وتانىمىزدىڭ بولاشاعى بيىكتە بولماق. مەن بارىس كيىمىن كيگەن سەبەبىم بۇگىنگى سايلاۋعا وزگەشە اجار بەرگىم كەلدى جانە قونايەۆ قالامىزعا دەگەن بيىك قۇرمەتتى سيمۆولى ارقىلى سۋرەتتەۋدى قالادىم. ءبىراق بۇگىنگى ءار ازامات ءوز تاڭداۋىن جاساعان ايرىقشا ساتتە بۇل ماڭىزدى ەمەس، ءماندىسى داۋىس بەرۋ الاڭىنان ەشبىر تۇرعىننىڭ قالىس قالماۋى، ءوز تاڭداۋى ارقىلى بەدەرلى بولاشاققا جول جالعاۋى بولماق»، - دەيدى ول.
ال تالدىقورعاندىقتار سايلاۋ ۋچاسكەسىنە جەلمايامەن جەتكەن.
تۇيەگە ءمىنىپ، داۋىس بەرۋگە كەلگەندەر اراسىندا 35 جاستاعى ۇلان بايزاقوۆ تا بار. ول سوڭعى 15 جىلدا تۇيە اسىراۋمەن اينالىسىپ كەلەدى. ۇلاننىڭ ايتۋىنشا، بۇل جانۋاردى اسىراۋ وڭاي ەمەس، دەگەنمەن قوس وركەشتى قاستەرلى مالدىڭ يەسى بولۋ ءبىر عانيبەت.
«اپتانىڭ دەمالىس كۇندەرى تۇيەمدى ورتالىق ساياباقتارعا الىپ شىعامىن. ۇستىنە مىنگەنىنە قۋانعان بالالاردى كورۋدىڭ ءوزى باقىت. وسىنداي قىزمەت كورسەتۋدەن تاپقان قاراجاتتى تۇيەنىڭ جەم- شوبىنە، ءدارى- دارمەگىنە جۇمسايمىن. بۇگىنگى سايلاۋعا ەرتەلەتىپ كەلىپ، داۋىس بەردىم. سەبەبى كۇنى بويى تۇيە باعىمىنا قاتىستى اتقاراتىن شارۋام كوپ»، - دەيدى ۇ. بايزاقوۆ.
پەتروپاۆلدا كوكتەمگى سۋ تاسقىنىنىڭ الدىن الۋ ماقساتىندا قار شىعارۋ جۇمىستارى قىزعان. سوندىقتان كوممۋنالدىق كاسىپورىن جۇمىسشىسى سايلاۋعا قاتىسۋعا تراكتورىمەن كەلگەن. بولاتبەك كارىموۆ تاڭداۋىن جاساسىمەن-اق دەرەۋ جۇمىس ورنىنا اتتانعان.
«تراكتورشى بولىپ ەڭبەك ەتكەنىمە 20 جىل. بىزگە جاقسى ءومىر ءسۇرۋ ءۇشىن كوپ نارسە كەرەك ەمەس، الدىمەن ەلدە تىنىشتىقتىڭ بولعانىن تىلەيمىز. بالا- شاعامىزدى اسىراۋ ءۇشىن تۇراقتى جۇمىس، ەڭ باستىسى ەرتەڭگە دەگەن سەنىم كەرەك. ءوزىم سايلاۋدان قالماۋعا تىرىسامىن. بۇگىن دە جۇمىستا جۇرسەم دە جارتى ساعاتقا سۇرانىپ، ءوز تاڭداۋىمدى جاساپ كەتتىم»، - دەيدى بولاتبەك كارىموۆ.
سونداي-اق، استانانىڭ 10№ سايلاۋ ۋچاسكەسىنە «نيندزيا تاسباقالار» داۋىس بەرۋگە كەلگەن. وسىلايشا، لەوناردو، رافاەل، دوناتەللو، ميكەلاندجەلو قازاقستانداعى ساياسي وزگەرىستەرگە «بەي- جاي قارامايتىنىن» ءبىلدىردى.
تاعى ءبىر استانالىق ەر ادام سايلاۋعا ديۆان باتىر كەيپىندە كەلدى. ونىڭ وبرازىنان ءۇي كيىمىن، قۋاتتاعىش سىمى بار تەلەفونىن جانە جامباسىنا جابىسقان قىزعىلت ديۆانىن بايقاۋعا بولادى.
Посмотреть эту публикацию в Instagram
بۇل سايلاۋدا ەلوردالىق تۇرعىنداردىڭ ءازىل- قالجىڭى ەرەكشە بايقالادى. جەلىدە استاناداعى سايلاۋ ۋچاسكەلەرىنىڭ بىرىندە ادىراسپان تۇتەتكەن ايەلدىڭ دە ۆيدەوسى تارادى. بۇل ارەكەتىمەن ءتىل-كوزدەن، بالە-جالادان ناقتى كىمدى قورعاعىسى كەلگەنى بەلگىسىز.