قىتاي ۋنيۆەرسيتەتتەرىندە قازاق تىلىنەن بايقاۋ وتەدى - شەتەلدەگى قازاق باسپا ءسوزى

استانا. قازاقپارات - «قازاقپارات» ح ا ا شەت مەملەكەتتەردە قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

جاقىندا قىتاي ۋنيۆەرسيتەتتەرىندە قازاق ءتىلى بويىنشا بايقاۋ وتەدى - People.cn

قىتايدا قازاق تىلىندە ءبىلىم بەرۋدى دامىتۋعا جاردەمدەسۋ جانە قىتاي مەن قازاقستان اراسىنداعى گۋمانيتارلىق سالاداعى ىنتىماقتاستىققا جاردەمدەسۋ ماقساتىندا قازاقستاننىڭ قىتايداعى ەلشىلىگى ۇسىنىپ، بەيجىڭ شەتەل تىلدەرى ۋنيۆەرسيتەتى ۇيىمداستىرعان قىتاي ۋنيۆەرسيتەتتەرى اراسىنداعى قازاق ءتىلى بايقاۋى وتەدى، دەپ جازادى «حالىق» گازەتى.

اتالعان باسىلىمنىڭ مالىمەتىنشە، 20-ناۋرىز كۇنى وتەتىن بۇل بايقاۋ قىتاي ءبىلىم مينيسترلىگىنىڭ حالىقارالىق دەپارتامەنتىنىڭ قولداۋىمەن ۇيىمداستىرىلادى. بايقاۋعا بۇكىل ەلدەگى ۋنيۆەرسيتەتتەردە شەت ءتىلى ماماندىعى قازاق ءتىلى بويىنشا ءبىلىم الاتىن قىتايلىق باكالاۆر ستۋدەنتتەرى قاتىسادى.

وزبەكستانداعى جاس دومبىراشىلار كورەرمەن ىقىلاسىنا بولەندى - «تامدى شارۋاگەرى»

11-ناۋرىز كۇنى وزبەكستانداعى ناۋاي وبلىسىنىڭ تامدى قازاق اۋدانىندا 15 اۋىلدان كەلگەن 500-گە جۋىق جاس دومبىراشى تامدى اۋداندىق مادەنيەت ۇيىندە «ونەرلى دومبىراشى جاستار» بايقاۋىندا ءوزارا باق سىناسىپ، ونەرلەرىن ورتاعا سالدى.

بۇل تۋرالى وسى اپتادا وزبەكستاندىق «تامدى شارۋاگەرى» گازەتى Facebook-تەگى پاراقشاسىندا «newsroom.kz» باسىلىمىنا سىلتەمە جاساپ حابارلادى.

اتالعان باسىلىمنىڭ كەلتىرگەن مالىمەتىنە سۇيەنسەك، جاستار اراسىنداعى تالانتتى ونەرپازداردى انىقتاپ، حالقىمىزدىڭ ءتول مادەنيەتىن، ءداستۇرلى تەرمە، جىراۋلىق پەن وركەستر ورىنداۋىنداعى ءان- كۇي مادەنيەتىن وسكەلەڭ ۇرپاققا دارىپتەۋدى ماقسات ەتكەن بايقاۋ وسى جولى سەگىزىنشى رەت وتكىزىلدى.

ونەر سايىسىن تامدى اۋدانى اكىمدىگى، اۋداندىق مادەنيەت ءبولىمى، اۋداندىق حالىققا ءبىلىم بەرۋ ءبولىمى، ايماقتىق جاستار ءىسى اگەنتتىگى جانە وزبەكستان جاستار وداعى تامدى اۋداندىق ءبولىمى ۇيىمداستىرعان. تامدىلىق ونەرپاز دارىنداردىڭ باسىن قوسقان ءداستۇرلى بايقاۋدىڭ جاۋاپتى ۇيىمداستىرۋشىسى - نۇرلان بەكنازاروۆ.

مادەنيەت قىزمەتكەرلەرى مەن اۋىل مەكتەپتەرى وقۋشىلارى قولداۋىن تاۋىپ، بۇگىندە جىل سايىن كورەرمەندەر مەن تامدىلىق جالىندى جاستار اسىعا كۇتەتىن ونەر سايىسىنا اينالىپ ۇلگەرگەن بايقاۋ شارتتارى جىل سايىن كۇردەلەنە تۇسۋدە. بيىل دومبىرادان باسقا ۇلتتىق اسپاپتار - ساز سىرناي، قوبىز، بايان، شىلدىرماق ت. ب. قوسىلىپ، بالالار ونەرى ءتۇرلى ۇلتتىق اسپاپتاردا كورىنىس تابادى.

Newsroom.kz باسىلىمىنىڭ دەرەگىنشە، بايقاۋعا قاتىسۋشىلار قۇرمانعازى، داۋلەتكەرەي، ابىل، تاتتىمبەت، ماحامبەت، دينا، سۇگىر، قازانعاپ سىندى كۇي الىپتارىنىڭ، سونداي- اق تاۋەلىباي كومپوزيتورلارى تۋىندىلارى مەن حالىق كۇيلەرىن ورىنداپ، تامدىلىق كورەرمەندەر ىقىلاسىنا بولەنگەن. بايقاۋ ناتيجەسىنە وراي جۇلدەلى I ،II ،Ⅲ ورىن يەگەرلەرى انىقتالدى. ال، باس جۇلدەگە №12 مەكتەپتىڭ دارىندى دومبىراشىلارى لايىق دەپ تانىلدى. اتالعان دومبىراشىلار بايقاۋدا ورىنداۋشىلىق شەبەرلىگى، وركەستر ورىنداعان ءان- كۇيىنىڭ كوركەمدىك دەڭگەيى جانە ساحنالىق مادەنيەتى مەن ۇلتتىق كيىم ۇلگىسى، دارىنى ارقىلى قاتارلاستارىنان وزا شاۋىپ، باس جۇلدەنى ەنشىلەگەن.

موڭعوليا ۇكىمەتى اۋىلعا كوشكەندەردى قولدايدى - «Kaznews»

موڭعوليا ۇكىمەتى جۇزەگە اسىرىپ جاتقان «جاڭا جاڭعىرۋ ساياساتى» اياسىندا «اۋىلدىڭ جاڭعىرۋى» اتتى كونفەرەنتسيا ۇيىمداستىرىلدى. بۇل رەتتە موڭعوليا ۇكىمەتى قالادان ايماققا، اۋىلعا كوشۋگە نيەت بىلدىرگەن ازاماتتاردى جان- جاقتى قولدايتىنىن جەتكىزدى، دەپ حابارلايدى موڭعوليانىڭ «Kaznews» اقپاراتتىق پورتالى.

اتالعان اقپارات كوزىنىڭ كەلتىرگەن دەرەگىنە سۇيەنسەك، ورتالىقسىزداندىرۋ جانە ايماق حالقىن ارتتىرۋ ماقساتى اياسىندا ءىرى ەلدى مەكەندەردىڭ حالقى 20 پايىزعا، ال ايماق حالقى 10 پايىزعا ارتادى.

جەرگىلىكتى جەرلەرگە (اۋىلعا) كوشىپ كەلگەن ازاماتتارعا 3 پايىزدىق يپوتەكالىق نەسيە بەرىلمەك.

سونىمەن قاتار «جاڭا جاڭعىرۋ ساياساتى» اياسىندا اۋىلعا قونىس اۋدارعان كاسىپورىندارعا ءبىر پايىزدىق جەڭىلدىكپەن نەسيە بەرۋ جوسپارلانعان.

قىتاي- قازاقستان لوگيستيكالىق ىنتىماقتاستىق بازاسىنان اتتانعان پويىز سانى 5 مىڭنان استى - People.cn

قىتايدىڭ نانكين كەدەنىنىڭ ستاتيستيكاسىنا سايكەس، 14 ناۋرىزداعى جاعداي بويىنشا قىتاي- قازاقستان لوگيستيكالىق ىنتىماقتاستىق بازاسى (ليانيۋنگان) جالپى 5 مىڭ قىتاي- ەۋروپا پويىزىن جىبەرىپ، 440 مىڭنان استام TEU-نى (ەۋروپالىق وداق تۋرالى شارت) تاسىمالدادى. بۇل ءوز كەزەگىندە «ءبىر بەلدەۋ، ءبىر جول» حالىقارالىق ەكونوميكالىق جانە ساۋدا ىنتىماقتاستىعى ماقساتىندا جۇزەگە اسىرىلعان العاشقى پلاتفورما جوباسى بولىپ وتىر، دەپ حابارلايدى قىتايدىڭ «People.cn» اقپارات پورتالى.

اتالعان باسىلىمنىڭ دەرەگىنشە، باتىس باعىتتاعى ترانزيت 157 مىڭعا جەتىپ، ەلدەگى جەتەكشى كورسەتكىشكە اينالدى. بۇل پويىز باعىتتارى ورتالىق ازيانىڭ بەس ەلىنەن تۇركيا، گەرمانيا، رەسەي، موڭعوليا جانە باسقا ەلدەردى قامتيتىن 6 جەلىگە كەڭەيدى، بارلىعى 104 حالىقارالىق جۇك ستانساسى بار.

ەردوعان ت م ۇ سامميتىندە ءسوز سويلەدى- «TRT»

تۇركيا پرەزيدەنتى رەجەپ تايپ ەردوعان انكاراداعى پرەزيدەنت سارايىندا ۇيىمداستىرىلعان تۇركى مەملەكەتتەرى ۇيىمىنىڭ (ت م ۇ) كەزەكتەن تىس سامميتىنە قاتىستى مالىمدەمە جاسادى. بۇل تۋرالى وسى اپتادا تۇركيا راديو تەلەۆيزيا پورتالى حابارلادى.

سامميتتىڭ ءساتتى اياقتالعانىن اتاپ وتكەن ەردوعان، تۇركياداعى جەر سىلكىنىسى مەن سۋ تاسقىنىنان كەيىن ۇيىم مۇشەلەرى مەن باقىلاۋشىلارىمەن بىرگە ىنتىماقتاسۋ ماقساتىندا باس قوسقاندارىن ايتقان.

سونداي-اق رەجەپ تايپ ەردوعان تۇرىك ينۆەستيتسيا قورىنىڭ تۇرىك الەمىندەگى ەكونوميكالىق ينتەگراتسياعا ۇلەس قوساتىنىن مالىمدەگەن.

سامميتكە قاتىسقان مەملەكەتتەر باسشىلارىنا العىس بىلدىرگەن تۇرىك ەلىنىڭ باسشىسى: «باسىمىزدان وتكەن اپاتتا تۇرىك الەمى رەتىندە كورسەتكەن ىنتىماق پەن بەرەكە-بىرلىكتى ەشقاشان ۇمىتپايمىز»، - دەدى.

ەردوعان تۇرىك الەمىندەگى ينتەگراتسيانىڭ قوزعالتقىشى بولىپ تابىلاتىن ەكونوميكا، ساۋدا، كولىك جانە ەنەرگەتيكا سالالارىنداعى ىنتىماقتاستىق ماسەلەسى دە قارالعانىن ايتىپ وتكەن.

قازاقستان يران مەن ساۋد ارابياسى اراسىنداعى قارىم- قاتىناستى قالپىنا كەلتىرۋدى قولدادى - «Parstoday»

قازاقستاننىڭ سىرتقى ىستەر مينيسترلىگى ساۋد ارابياسى مەن يران اراسىنداعى كەلىسىم مەن ديپلوماتيالىق قارىم-قاتىناستى جاقسارتۋدى قۇپتادى، دەپ حابارلادى يراندىق «Parstoday» اقپارات اگەنتتىگى.

اتالعان اقپارات اگەنتتىگىنىڭ مالىمەتىنشە، قازاقستاننىڭ سىرتقى ىستەر مينيسترلىگى وسى جۇمادا استانانىڭ ساۋد ارابياسى كورولدىگى مەن يران يسلام رەسپۋبليكاسى اراسىنداعى ديپلوماتيالىق قارىم- قاتىناستاردى قالپىنا كەلتىرۋ ماقساتىندا 2023 -جىلعى 10-ناۋرىزدا بەيجىڭدە قول جەتكىزىلگەن كەلىسىمدەردى قۇپتايتىنىن حابارلادى.

«قول جەتكىزىلگەن كەلىسىمدەر قازاقستاننىڭ يسلامدىق تاتۋلاسۋ جونىندەگى باستاماسىنا تولىعىمەن سايكەس كەلەدى، دەپ اتاپ ءوتتى قر سىرتقى ىستەر مينيسترلىگى. بۇل مينيسترلىك تەھران مەن ەر- رياد وكىلدەرىنىڭ قىتايداعى كەلىسسوزدەرى مەن وسى ەلدىڭ ءرولىن جوعارى باعالادى» ، دەپ جازادى يراندىق ب ا ق.

ورتا عاسىرعا تيەسىلى قۇندى زاتتار تابىلدى - «ءوز ا»

وزبەكستان مەن قازاقستان جوعارى ءبىلىم سالاسىندا ىنتىماقتاستىق جاسايدى. بۇل رەتتە وسىنداي مازمۇنداعى «حالىقارالىق كەلىسىمدى بەكىتۋ تۋرالى» وزبەكستان پرەزيدەنتىنىڭ شەشىمى قابىلداندى. سوعان سايكەس، وزبەكستان مەن قازاقستان رەسپۋبليكالارى اراسىندا جوعارى ءبىلىم جانە جوعارى وقۋ ورنىنان كەيىنگى ءبىلىم بەرۋ سالاسىنداعى ىنتىماقتاستىق تۋرالى كەلىسىم بەكىتىلدى. بۇل كەلىسىمگە 2022 -جىلى 22-جەلتوقساندا تاشكەنتتە قول قويىلعان. بۇل تۋرالى وسى اپتادا «ءوز ا» اقپاراتتىق اگەنتتىگى حابارلايدى.

وزبەكستاندىق باسىلىمنىڭ مالىمەتىنشە، حالىقارالىق كەلىسىمدى جۇزەگە اسىرۋعا جاۋاپتى قۇزىرەتتى ورگان رەتىندە جوعارى ءبىلىم، عىلىم جانە يننوۆاتسيالار مينيسترلىگى بەلگىلەنگەن. مينيسترلەر كابينەتى جانە ءتيىستى مينيسترلىك پەن ۆەدومستۆولاردىڭ باسشىلارى وسى حالىقارالىق شارت كۇشىنە ەنگەننەن كەيىن وزبەكستاننىڭ مىندەتتەمەلەرىنىڭ ورىندالۋىن قامتاماسىز ەتەدى.

سونداي-اق وسى اپتادا «ءوز ا» اقپارات اگەنتتىگىندە «تاشكەنت وبلىسىندا ورتا عاسىرلارعا تيەسىلى قۇندى زاتتار تابىلدى» دەگەن تاقىرىپتاعى اقپارات جاريالاندى.

اتالعان ب ا ق- تىڭ مالىمەتىنشە، تاشكەنت وبلىسىنىڭ بوكە اۋدانىندا جۇمىرتقا ءتارىزدى 2 دوڭەس جانە 2 دانا ورتا عاسىرلارعا تيەسىلى ارحەولوگيالىق ەسكەرتكىش تابىلعان.

«تابىلعان تاريحي نىسانداردىڭ اراسىندا ايەل بەينەسى بەدەرلەنگەن تاسباقا تارىزدەس قۇمىرا بار. مۇنداي قۇندى ىدىس تاشكەنت وبلىسىنان العاش رەت تابىلدى. ول ەجەلگى گرەك ءداستۇرى بويىنشا جاسالعان. بۇل ەجەلگى «چوچ- تاشكەنت» ايماعىنا سەليەۆكيلەر كوسەمى دەمودامنىڭ (ب. ز. د. III ع. ) كەلۋىمەن بايلانىستى بولۋى مۇمكىن. قىش ىدىستا گرەك قۇدايىنىڭ بەينەسى بەينەلەنگەن»، دەپ جازادى وزبەكستاندىق باسىلىم.

اۆتور

بەيسەن سۇلتان ۇلى