ۇشقىشتار سۋرەت ءۇشىن جۇمىستان بوساتىلدى
وندا ۇشقىشتار كوفە قۇيىلعان ستاقاندى ۇشاقتى اۋەگە كوتەرۋ يىنتىرەگىنە قويعانى بايقالادى، - دەپ حابارلايدى Tengritravel.kz ءتىلشىسى India Times باسىلىمىنا سىلتەمە جاساپ.
وقيعا 8-ناۋرىزدا دەليدەن گۋۆاحاتي قالاسىنا ۇشقان لاينەردىڭ بورتىندا بولعان. جەلىدە ۇشقىشتار كابيناسىندا تۇسىرىلگەن سۋرەت تاراپ، سونىڭ سالدارىنان داۋ شىققان. ەر ادامدار كوفە قۇيىلعان ستاقاندى ۇشاقتى اۋەگە كوتەرۋ يىنتىرەگىنە قويىپ، حولي مەرەكەسىندە دايىندالاتىن ءداستۇرلى ءتاتتى قۋىرىلعان كونديتەرلىك ءونىم - گۋدجياس جەگەن.
ءۇندىستاننىڭ ازاماتتىق اۆياتسيا باس باسقارماسى جاۋاپسىز ەكيپاج مۇشەلەرىن دەرەۋ انىقتاپ، ولارعا قارسى شارالار قابىلداۋدى تالاپ ەتتى.
«كەلەسى كۇنى SpiceJet اۋەكومپانياسى كىنالىلەردى تاۋىپ، ولاردى رەيستەردەن الىپ تاستادى. تەرگەۋ اياقتالعاننان كەيىن ۇشقىشتارعا قاتىستى تارتىپتىك شارالار قولدانىلادى»، - دەدى SpiceJet وكىلى.
اۋەكومپانيانىڭ تاجىريبەلى ۇشقىشتارى دا ارىپتەستەرىنىڭ ارەكەتىنە الاڭداۋشىلىق ءبىلدىردى.
«كوفە ستاقانى ورتالىق كونسولدىڭ ورتاسىندا ۇشاقتىڭ جانارماي تۇتقالارىنا قويىلدى. ەگەر كوفە توگىلسە، بۇل ەڭ جاقسى جاعدايدا قىسقا تۇيىقتالۋعا جانە جالعان ءورت سيگنالىنا اكەلۋى مۇمكىن. ەكيپاج ءورت سوندىرگىشتەردى ءتۇسىرىپ، توتەنشە جاعداي جاريالاۋى كەرەك. باقىلاۋ تاقتاسىنا سۇيىق زاتتىڭ توگىلۋى - ناعىز بىلىق. ولار قىسقا تۇيىقتالۋدى جانە لاينەردى باقىلاۋدى جوعالتۋدى نەمەسە ديسپەتچەرمەن بايلانىستى قيىنداتۋى مۇمكىن»، - دەدى ولار.