بۇگىن قازاقستاندا ءماجىلىس جانە ءماسليحات دەپۋتاتتارىن سايلاۋ كۇنى
بۇگىن ۋچاسكەلەردە داۋىس بەرۋ جەرگىلىكتى ۋاقىت بويىنشا ساعات 07:00-دەن 20:00-گە دەيىن جۇرگىزىلەدى. ۋچاسكەلىك سايلاۋ كوميسسيالارى جەرگىلىكتى ۋاقىت بويىنشا ساعات 20:00-دە داۋىس ساناۋدى، داۋىس بەرۋ ناتيجەلەرى تۋرالى حاتتاما جاساۋدى باستايدى.
ۋاقىت بەلدەۋىنە بايلانىستى كەيبىر شەت مەملەكەتتەردە داۋىس بەرۋ بىزدەن ەرتە باستالادى. قازاقستاندىقتار ءومىر سۇرەتىن ەۋروپا، ۇلىبريتانيا، رەسەي، اقش، قىتاي، كورەيا، ءۇندىستان سىندى ءبىرقاتار مەملەكەتتە 77 داۋىس بەرۋ ۋچاسكەسى اشىلعان.
بۇل جولى داۋىس ساناۋ پروتسەدۋراسى ۇزاققا سوزىلادى. سەبەبى بيۋللەتەندەر سانى ادەتتەگىدەن كوپ. ءبىراق، زاڭ بويىنشا داۋىستاردى ساناۋ 12 ساعاتتان اسپاۋى ءتيىس. داۋىستاردى ساناۋ بارلىق سايلاۋ ۋچاسكەلەرىندە تاڭعى 8:00-دە اياقتالادى.
رەسپۋبليكالىق ماڭىزى بار قالالاردا (استانا، الماتى جانە شىمكەنت) داۋىس بەرۋ ءتورت بيۋللەتەن بويىنشا سانالادى. ونىڭ ەكەۋى پارلامەنت ءماجىلىسى دەپۋتاتتارىن سايلاۋ جانە ەكەۋى - ءماسليحاتتار بويىنشا. ال 17 وبلىستا داۋىس بەرۋ بەس سايلاۋ بيۋللەتەنى بويىنشا وتپەك. ونىڭ ەكەۋى ءماجىلىس بويىنشا، ەكەۋى - وبلىستىق ءماسليحاتتار بويىنشا جانە بىرەۋى - اۋداندىق نەمەسە قالالىق ءماسليحات بيۋللەتەندەرى.
ق ر كونستيتۋتسياسىنا سايكەس، پارلامەنت ءماجىلىسى ارالاس سايلاۋ جۇيەسى بويىنشا كونستيتۋتسيالىق زاڭدا بەلگىلەنگەن تارتىپپەن سايلاناتىن 98 دەپۋتاتتان تۇرادى. ءبىرىڭعاي جالپىۇلتتىق سايلاۋ وكرۋگى اۋماعى بويىنشا، ياعني پارتيالىق ءتىزىم بويىنشا ءماجىلىستىڭ 69 دەپۋتاتى، ءبىر مانداتتى اۋماقتىق سايلاۋ وكرۋگتەرى بويىنشا - 29 دەپۋتات سايلانادى.
ەسكە سالا كەتسەك، 19 قاڭتاردا مەملەكەت باسشىسى قاسىم- جومارت توقايەۆ جەتىنشى سايلانعان ق ر پارلامەنتىنىڭ ءماجىلىسىن تاراتۋ جانە 19-ناۋرىز كۇنى پارلامەنت ءماجىلىسى دەپۋتاتتارىنىڭ كەزەكتەن تىس سايلاۋىن تاعايىنداۋ تۋرالى جارلىققا قول قويعان ەدى. بۇل كۇنى ماجىلىسپەن قاتار ءماسليحات دەپۋتاتتارىن دا كەزەكتەن تىس سايلاۋ ۇسىنىلدى.
بۇل كۇنى 12 ميلليونعا جۋىق ازامات تاڭداۋ جاسايدى. الدىن الا تۇرعىلىقتى جەرى بويىنشا 11970406 سايلاۋشى انىقتالدى. سايلاۋشىلاردىڭ ەڭ كوبى - 1177507 سايلاۋشى تۇركىستان وبلىسىندا، ال ەڭ ازى - 138277 سايلاۋشى ۇلىتاۋ وبلىسىندا تىركەلگەن. 2023 -جىلعى 4-ناۋرىزدان باستاپ ۋچاسكەدەگى سايلاۋشىلار تىزىمىندەگى دەرەكتەرى تەكسەرۋ مۇمكىندىگى بەرىلدى.
ءماجىلىس سايلاۋىن بايقاۋعا 41 شەت مەملەكەت پەن 12 حالىقارالىق ۇيىمنان 793 بايقاۋشى رەسمي تىركەلدى.
سايلاۋ كۇنى 45 مىڭنان استام پوليتسەي قوعامدىق ءتارتىپتى قامتاماسىز ەتەدى. ونىڭ ىشىندە بەلگىلى ءبىر بولىگى تىكەلەي سايلاۋ ۋچاسكەلەرىندە جانە ءبىر بولىگى كوشەدە ءتارتىپتى قاداعالايدى. ودان بولەك، سايلاۋ ۋچاسكەلەرىنە جاقىن اۋماقتاردا كۇزەت بولادى.
سايلاۋ كۇنى مۇگەدەكتىگى بار جاندارعا دا ءتيىستى جاعداي جاسالادى. بارلىق وڭىردەگى سايلاۋ ۋچاسكەلەرىندە برايل ءشريفتى بار ترافارەتتەر، سونداي- اق كانديداتتار تىزبەسى بار بيۋللەتەندەردىڭ اۋديو نۇسقالارى قولجەتىمدى بولادى.
سونداي-اق سايلاۋ ۋچاسكەلەرىندە سانيتارلىق تالاپتار ساقتالۋى ءتيىس. دەنساۋلىق ساقتاۋ ۆيتسە-ءمينيسترى - باس مەملەكەتتىك سانيتاريالىق دارىگەر ايجان ەسماعامبەتوۆا داۋىس بەرۋشىلەرگە ماسكا تاعۋدى ۇسىندى.
بۇگىن الەم بويىنشا العاشقىلاردىڭ ءبىرى بولىپ استانا ۋاقىتىمەن ساعات تاڭعى 4-تە سەۋل مەن توكيودا سايلاۋ ۋچاسكەلەرى اشىلدى. وڭتۇستىك كورەياداعى ق ر ازاماتى كۋرسانت اسانوۆ ەلنۋر ءبىرىنشى بولىپ داۋىس بەردى.