رامازان ايىندا قالاي دۇرىس تاماقتانۋ كەرەك - دارىگەر كەڭەسى

None
الماتى. قازاقپارات – 23-ناۋرىزدا قاسيەتتى رامازان ايى باستالادى. قاسيەتتى ايدا الەم مۇسىلماندارى يسلام دىنىندەگى بەس پارىزدىڭ ءبىرى - ورازا ۇستاپ، اۋىز بەكىتۋگە نيەت ەتەدى.

وسىعان وراي قازاقپارات تىلشىسىنە الماتى قالالىق N11-ەمحانانىڭ دارىگەرى اسەل قۇدايبەرگەنوۆا رامازان ايىندا دەنساۋلىققا زيان تيگىزبەي، دۇرىس تاماقتانۋدىڭ 9 جولىن ايتىپ بەردى.

«رامازان ايىندا ورازا تۇتقان ءاربىر مۇسىلمان ءتان مەن جان ساۋلىعىن ويلايدى. ءبىراق، كوپشىلىگى سارەسى مەن اۋىزاشار مازىرىندەگى ەرەكشەلىكتەن حابارسىز. ايلاردىڭ سۇلتانىندا ورازا ۇستاعان جاندار دەنساۋلىققا زيان تيگىزبەيتىندەي دۇرىس تاماقتانۋ جولدارىن بىلگەن دۇرىس. ەندەشە ورازادا دۇرىس تاماقتانۋدىڭ توعىز ءادىسىن بىلگەن ءجون»، - دەيدى دارىگەر.

قاسيەتتى ايدا دۇرىس تاماقتانۋدىڭ دارىگەر ايتقان 9 كەڭەسى

اۋىز اشۋدى قۇرمامەن باستاعان ءجون

رامازان ايىندا اۋىزاشار مەن سارەسىگە اس دايىنداۋ كەزىندە جاڭا پىسكەن ونىمدەردى پايدالانۋ قاجەت. ماسەلەن، جەمىس- جيدەك، كوكونىس تاڭداعان كەزدە وسىنى ەسكەرىڭىز. قۇرما مەن سۋدى اۋىز اشقاندا پايدالانۋدىڭ ءبىر پايداسى - اس ىشەر الدىندا ادامعا ءوزىنىڭ اعزاسىندا تاماققا دەگەن قوسىمشا قاجەتتىلىكتىڭ بار نە جوعىن انىقتاۋىنا مۇمكىندىك تۋادى.

سۋدى كوبىرەك ءىشۋ كەرەك

اۋىز اشقان سوڭ سۋدى كوبىرەك ءىشىڭىز. الايدا، سۋدى تاماقتانىپ بولعان سوڭ ىشكەن ابزال. تاماقتى دا اسىقپاي، از- ازدان جەڭىز، قارنىم اشادى دەپ تويىپ الماۋ كەرەك.

تەز شولدەتەتىن تاعامداردان باس تارتقان ءجون

رامازان ايىندا اس ءمازىرىڭىزدى ۋاقىتشا وزگەرتۋگە تۋرا كەلەدى. كۇندەلىكتى قولداناتىن تۇزدى ونىمدەردەن، تۇزدالعان قيار، قىزاناق، تۇزدى سالاتتار مەن بالىقتان باس تارتىڭىز. ونىڭ ورنىن جەمىس-جيدەكتەرمەن، سۋمەن كوبىرەك تولىقتىرىڭىز.

اسىقپاي تاماقتانۋ قاجەت

كۇنى بويى تاماقتانۋدان باس تارتقان ادام ىشكى كۇيزەلىسكە تۇسەدى. بۇل اسىرەسە، ورازانى العاش ۇستاعان جاندار ءۇشىن ماڭىزدى. اۋىز اشقان كەزدە قۇرمامەن، سۋمەن نەمەسە سورپا، ەت قوسىلعان كوكونىس تاعامى سياقتى جەڭىل تاعامداردى ءىشىپ، جەۋ كەرەك.

تاتتىدەن باس تارتۋ كەرەك

اس مازىرىڭىزدەن تاتتىلەردى (كونديتەرلىك ونىمدەر، تورت، ءتاتتى بالىشتەر) الىپ تاستاڭىز. سەبەبى، بۇلار اعزاڭىزدى السىرەتىپ، قارنىڭىزدى تەز اشتىرادى. سونداي-اق، رامازان ايىندا تاتتىلەردى كوبىرەك قولدانۋ قان قىسىمىڭىزدى كوتەرەدى. تەك اۋىزاشاردان سوڭ ەكى-ءۇش ساعات وتكەن سوڭ تاتتىلەردىڭ ورنىنا - قۇرما، كەپتىرىلگەن ورىك، مەيىز، جاڭعاق قولدانىڭىز.

كوفە ىشپەگەن دۇرىس

ەگەر ءسىز تاڭىڭىزدى جۇمىسپەن ەمەس، كوفەمەن باستار بولساڭىز، رامازان ايىندا كوفەنى قويا تۇرىڭىز. ويتكەنى، كوفە اعزاعا كوپتەگەن زياندى اسەرلەرىن تيگىزۋى مۇمكىن.

تاماق تانۋ تارتىبىنە مۇقيات بولۋ قاجەت

ادەتتە ءبىز كۇنىنە ءۇش رەت تاماقتانامىز. رامازان ايىندا دا وسى ادىسپەن ءجۇرىڭىز. ول ءۇشىن اۋىزاشاردىڭ ءبىرىنشى بولىگىندە - ىستىق تاعامداردى، ەكىنشى بولىگىندە مايسىز تاعامدار مەن بالىقتى، ال سارەسىدە - جەمىس-جيدەكتەردى قولدانىڭىز. بۇل ءادىس ءسىزدىڭ دەنساۋلىعىڭىز ءۇشىن وتە ماڭىزدى.

پايدالى اس ءىشۋ كەرەك

شايدى كوپ ىشەتىن بولساڭىز، بۇل ايدا جالبىز شايى مەن كوك شايدى كوبىرەك ءىشىڭىز. سونداي- اق، ءسۇت ونىمدەرىن ء(سۇت، ايران، قاتىق، ىرىمشىك) كوبىرەك قولدانىڭىز. ءسۇت، ايران، ىرىمشىك، قۇرت سەكىلدى ازىقتار ساپالى پروتەين، كالتسيي، فوسفور، مىرىش سەكىلدى مينەرالدار مەن B6، B12 سەكىلدى ماڭىزدى دارۋمەندەرگە باي.

سارەسىگە سەرگەك بولىپ ويانۋ قاجەت

ول ءۇشىن جاتار الدىندا مايلى تاعامدار قولدانباڭىز. ونىڭ ورنىن جەمىس-جيدەكتەرمەن (ءجۇزىم، الما، المۇرت، قۇلپىناي) اۋىستىرىڭىز. اتى اتالعان جەمىستەر ميدىڭ قالىپتى جۇمىس جاساۋىنا جانە جاقسى تىنىعۋىڭىزعا اسەر ەتەدى. سارەسى ۋاقىتىندا دا كۇندىز قارنىم اشادى دەپ تويا تاماقتانباڭىز.

ەسكە سالا كەتەيىك، قازاقستاننىڭ بارلىق ءوڭىرى بويىنشا ورازا كەستەسى جاريالاندى.

سونداي-اق باس ءمۇفتي ناۋرىزباي قاجى تاعان ۇلى رامازان ايى بيىل 23-ناۋرىزدا باستالاتىنىن، ءساۋىر ايىنىڭ 17 نەن 18 ىنە قاراعان ءتۇن - قاسيەتتى قادىر ءتۇنى، 21-ءساۋىر - ورازا ايت مەرەكەسى اتالىپ وتەتىنىن ايتقان ەدى.

سوڭعى جاڭالىقتار