ارگەنتينادا بۇرىن-سوڭدى بولماعان ىستىق تىركەلدى

استانا. قازاقپارات - ارگەنتينادا بۇرىن-سوڭدى بولماعان ىستىق تىركەلدى. رەكوردتىق دارەجەگە دەيىن كوتەرىلگەن تەمپەراتۋرادان ەگىن قۋراپ، ورمان ورتتەرى تاراپ، ونسىز دا جاعدايى ءماز ەمەس ەل ەكونوميكاسىنا قىسىم ارتىپ جاتىر.

بۇل تۋرالى قازاقپارات CNN-گە سىلتەمە جاساپ حابارلايدى.

الەم بويىنشا توتەنشە اۋا رايىن باقىلايتىن كليماتولوگ ماكسيميليانو ەررارانىڭ سوزىنشە، ەلدە جەلتوقساننان اقپانعا دەيىن جالعاسقان جاز باقىلاۋ تاريحىنداعى ەڭ ىستىق جاز بولعان. ناۋرىز جاعدايدى جەڭىلدەتكەن جوق.

ۇلتتىق مەتەورولوگيا قىزمەتىنىڭ مالىمەتىنشە، ارگەنتينانىڭ شىعىس-ورتالىق بولىگىندە اۋا تەمپەراتۋراسى ناۋرىزدىڭ العاشقى 10 كۇنىندە نورمادان 8-10 سەلسيا گرادۋس جوعارى بولعان. بۋەنوس-ايرەستە 28-اقپاننان بەرى كۇن سايىن تەرمومەتر باعانى 30 سەلسيا گرادۋستان اسادى. ارگەنتينانىڭ تۇكپىر-تۇكپىرىندە ناۋرىزدا كەيىنگى 63 جىلدا بولماعان ەڭ جوعارى تەمپەراتۋرا تىركەلىپ جاتىر.

عالىمداردىڭ پىكىرىنشە، الەم بويىنشا تەمپەراتۋرا ءوسىپ جاتقاندىقتان، اپتاپ ىستىق عالامشار بولىكتەرىندە ءجيى بولىپ تۇرادى.