بوكستان الەم چەمپيوناتى: قازاقستاندىق بوكسشى وزبەكستاندىق سپورتشىنى جەڭدى

استانا. قازاقپارات - ءۇندىستاننىڭ نيۋ-دەلي قالاسىندا بوكستان ايەلدەر اراسىندا ءوتىپ جاتقان الەم چەمپيوناتىندا ريمما ۆولوسەنكو باستاپقى كەزدەسۋىن ءساتتى وتكىزدى، دەپ حابارلايدى قازاقپارات ءتىلشىسى.

ريمما ۆولوسەنكو 60 كەلىگە دەيىنگى سالماقتا ءوزى سياقتى ازيا چەمپيونى، وزبەكستاندىق سيتورا تۇردىبەكوۆامەن جۇدىرىقتاستى.

2022-جىلى ىستانبۇل قالاسىندا وتكەن دۇنيەجۇزىلىك دودادا ر. ۆولوسەنكو العاشقى اينالىمدا-اق اعىلشىن قىزى شونا ۋيتۋەلدەن جەڭىلىپ قالعان ەدى.

بۇل جولى ءبىرىنشى راۋندتا بەس تورەشىنىڭ ۇشەۋى وزبەكستاندىق بوكسشى باسىم دەپ تاپتى. ەكىنشىسىندە ريمما تارازى باسىن وزىنە اۋداردى. ءبىراق ول ءۇشىنشى راۋندتا ەسكەرتۋ الىپ قالدى. دەگەنمەن قازىلار جەڭىستى ريمما ۆولوسەنكوعا بەردى.

ر. ۆولوسەنكونىڭ كەلەسى قارسىلاسى - ارمەنيالىق ەليدا كوچاريان.

بۇگىن سونداي-اق قازاقستاننان فاريزا شولتاي 81 كەلىگە دەيىنگى سالماقتا ترينيداد جانە توباگو ەلىنىڭ وكىلى ليەنن بۋدرەممەن رينگكە شىعادى.

ەسكە سالا كەتەيىك، بۇدان بۇرىن بوكستان الەم چەمپيوناتىندا جازيرا وراقبايەۆانىڭ العاشقى قارسىلاسىنان نوكاۋتپەن جەڭگەنىن جازعان بولاتىنبىز.