دەپوزيتتەرگە وتەماقى تولەۋ ءراسىمى قالاي جۇزەگە اسادى

استانا. قازاقپارات - ۇكىمەت باسشىسى قاڭتار ايىندا دەپوزيتتەر بويىنشا وتەماقى تولەۋ تۋرالى قاۋلىعا قول قويدى.

قۇجاتقا سايكەس، دەپوزيتى بار قازاقستاندىقتارعا 10 پايىز كولەمىندە وتەماقى تولەنەدى. سالىمشىلار بۇگىننەن باستاپ دەپوزيتىنەن ءىشىنارا نەمەسە تولىعىمەن اقشا الا الادى. مەملەكەت ول ءۇشىن ەكىنشى دەڭگەيلى بانكتەرگە جالپى سومماسى 306 ميلليارد تەڭگە كولەمىندە اقشا اۋدارعان. مۇنىڭ جيناق، مەرزىمدى، مەرزىمسىز، ءبىلىم بەرۋ جيناقتاۋ سالىمدارى جانە تۇرعىن ءۇي قۇرىلىس جيناقتارى جۇيەسىندەگى سالىمدارعا دا قاتىسى بار. وتەماقى تولەنەتىن ەڭ جوعارى سوما - 20 ميلليون تەڭگە. وتەماقى قانداي دەپوزيتتەرگە تولەنەدى؟ وتەماقى الۋدىڭ شارتتارى قانداي؟ بۇل تۋرالى تولىعىراق قازاقپارات ساراپشىسىنىڭ ماتەريالىندا.

وتەماقى قانداي دەپوزيتتەرگە تولەنەدى

قارجى نارىعىنداعى گەوساياسي قاتەرلەردىڭ سالدارىنان قارجى نارىعىنىڭ تۇراقتىلىعىن قامتاماسىز ەتۋ جانە تەڭگە دەپوزيتتەرىن قولداۋ ءۇشىن ۇلتتىق بانك ۇكىمەتپەن بىرلەسىپ بيۋدجەت قاراجاتىنىڭ ەسەبىنەن جەكە تۇلعالاردىڭ دەپوزيتتەرى بويىنشا وتەماقى تولەۋ جايلى باعدارلاما قابىلدادى. قۇجات قازاقستان رەسپۋبليكاسى ۇكىمەتىنىڭ 2022-جىلعى 27- تامىزداعى قاۋلىسىمەن بەكىتىلگەن. بەكىتىلگەن نورمالارعا سايكەس، «پروبلەمالىق كرەديتتەر قورى» ا ق جانە «قازاقستاننىڭ تۇراقتى دامۋ قورى» ا ق دەپوزيتتەر تۋرالى اقپارات نەگىزىندە دەپوزيتتەر بويىنشا سىياقى سوماسىن بەلگىلەنگەن تارتىپپەن ەكىنشى دەڭگەيدەگى بانكتەرگە اۋدارادى.

باعدارلاماعا قاتىسۋعا 2022-جىلعى 23- اقپانداعى جاعداي بويىنشا سالىمدارعا كەپىلدىك بەرۋ جۇيەسىنە قاتىسۋشى - ءبىر نەمەسە بىرنەشە ەكىنشى دەڭگەيدەگى بانكتە جانە «وتباسى بانك» اكتسيونەرلىك قوعامىندا اشىلعان جەكە تۇلعالاردىڭ تەڭگەمەن جيناعان سالىمدارى قاتىسا الادى. بانكتەر وتەماقىنى 23- اقپاندا شوتتاردا بولعان جيناق سوماسىنا قاراي ەسەپتەيدى. ەڭ جوعارى شەك 20 ميلليون تەڭگەدەن اسپاۋى كەرەك. اقشانى ءىشىنارا العان جاعدايدا پايىزدار شوتتاعى قالعان سوما نەگىزىندە تولەنەدى.

ناقتىراق ايتساق، مىناداي تەڭگە سالىمدارىنا وتەماقى تولەنۋى ءتيىس:

- جيناق سالىمدارى؛

- مەرزىمدى سالىمدار (تۇرعىن ءۇي قۇرىلىس جيناقتارى مەن ءبىلىم بەرۋ جيناقتاۋ سالىمدارىن قوسا العاندا) .

وتەماقى الۋدىڭ شارتتارى

تولەم شارتى بويىنشا سالىمشى دەپوزيتتە قاراجاتتى ءبىر جىل بويى، ياعني 2023-جىلدىڭ 23- اقپانىنا دەيىن ساقتاۋى كەرەك. ال وتەماقى تولەنەتىن جاڭا دەپوزيت اشقان كەزدە، وتەماقى تولەنەتىن دەپوزيت مەرزىمى اياقتالعان كۇننەن باستاپ جاڭا دەپوزيت اشىلعان كۇنگە دەيىنگى كەزەڭ ءۇشىن وپەراتسيالىق كۇن ىشىندە تىركەلگەن ەڭ تومەنگى قالدىققا تولەنەدى.

قازاقستاننىڭ دەپوزيتتەرگە كەپىلدىك بەرۋ قورىنىڭ مالىمەتىنشە، 2023-جىلدىڭ 16- ناۋرىزىندا تەڭگەلىك سالىمدار بويىنشا وتەماقى (سىيلىقاقى) ەسەپتەۋگە ارنالعان قاراجات ەكىنشى دەڭگەيدەگى بانكتەرگە كەلىپ ءتۇستى. سىياقى ەكى كۇننىڭ ىشىندە 2 ميلليون 615 مىڭ سالىمشىنىڭ شوتىنا تۇسەدى. ونى دەپوزيت اشقان بانككە بارىپ، ءوتىنىش تاستاعاندار عانا الادى. 10 پايىزدىق مولشەرلەمە بويىنشا وتەلەتىن ەڭ جوعارعى سوما - 20 ميلليون تەڭگە.

«پروبلەمالىق كرەديتتەر قورى» ا ق پەن «قازاقستاننىڭ ورنىقتىلىق قورى» ا ق اقشالاردى بانكتەرگە اۋداردى. اۋدارىلعان قاراجاتتاردىڭ جالپى سوماسى 306,6 ميلليارد تەڭگە بولدى. قاعيدالارعا سايكەس، ەكىنشى دەڭگەيدەگى بانكتەر ەكى جۇمىس كۇنى ىشىندە (2023-جىلعى 20- ناۋرىزعا دەيىن) تيەسىلى سىيلىقاقىنى ءوتىنىش بەرگەن دەپوزيتورلاردىڭ شوتتارىنا اۋدارادى.

«وتەماقى تولەۋ ءراسىمىنىڭ اياقتالىپ كەلە جاتقاندىعىن قۋانا حابارلايمىز. قازاقستاننىڭ دەپوزيتتەرگە كەپىلدىك بەرۋ قورى 15- ناۋرىزدا بانكتەردەن سالىمشىلاردىڭ اقتىق ءتىزىلىمىن الىپ، ولاردى وپەراتورعا جولدادى. جاقىن كۇندەرى بانكتەر تولەمدەردى تولىق كولەمدە اياقتايدى»، - دەدى ق د ك ب ق ءتوراعاسىنىڭ ورىنباسارى الماس قۇدايبەرگەنوۆ.

وتباسى بانك سالىمشىلارىنىڭ دەپوزيتتەرى بويىنشا تولەنەتىن وتەماقى

«وتباسى بانك» ا ق ورتالىق فيليالىنىڭ ديرەكتورى جانسۇلتان ماتاي بانك تەڭگە دەپوزيتتەرىن قورعاۋ بويىنشا وتەماقى بەرۋ باعدارلاماسىنا قاتىسىپ جاتقانىن مالىمدەگەن بولاتىن. جەكە تۇلعالاردىڭ وتباسى بانكىندە اشىلعان دەپوزيتتەرى بويىنشا رەسپۋبليكالىق بيۋجەت ەسەبىنەن 10 پايىز مولشەرىندە وتەماقى قاراستىرىلعان. ايتا كەتەيىك، تولەنگەن وتەماقى سوماسىنا مەملەكەتتىك سىياقى ەسەپتەلمەيدى.

«بۇل جەردە نەسيە جيناپ جاتقان، ازىرگە باسپانا الماعان ادام دا باعدارلاماعا قاتىسا الادى. وعان دا 10 پايىز وتەماقى بەرىلەدى. سونداي-اق 2022-جىلدىڭ 20- اقپانىنا دەيىن بىزدەن ارالىق جانە الدىن الا زايم العان، بىزدەگى كەپىلدە تۇرعان دەپوزيتتەرگە دە 10 پايىز ۇستىنە قوسىلادى»، - دەدى جانسۇلتان ماتاي.

تەڭگە دەپوزيتتەرىنە 10 پايىز وتەماقى تولەۋ ءوزىن اقتادى ما

تاۋەلسىز قارجى ساراپشىسى اندرەي چەبوتاريەۆ تەڭگە دەپوزيتتەرىنە 10 پايىز وتەماقى تولەۋ شاراسىن ءساتتى ءراسىم رەتىندە باعالادى. ول سوزىندە وتەماقىعا تولەنەتىن اقشانىڭ ۇلتتىق قوردان ەمەس، مەملەكەتتىك بيۋدجەتتەن الىنعانىن ەرەكشە اتاپ ءوتتى.

«بۇگىن سالىمشىلارعا ناقتى اقشا اۋدارىلا باستادى. باعدارلاما ءوزىن اقتادى. ءبىر جىل بۇرىن داعدارىس كەزىندە دەپوزيتتەردىڭ اۋىتقۋى تىركەلگەن جوق. كەرىسىنشە، رەكوردتىق كولەمدە جاڭا دەپوزيتتەر پايدا بولدى. دەپوزيتتەردىڭ دوللارلانۋى بولعان جوق. وسىنىڭ ءبارىن ەسكەرىپ، باعدارلاما ءساتتى اياقتالدى دەۋگە بولادى. ويتكەنى ءوز مىندەتىن ورىندادى»، - دەدى اندرەي چەبوتاريەۆ.

قوسىمشا سۇراقتارمەن قايدا جۇگىنۋگە بولادى

سالىمشىلار وتەماقى تالاپتارىنا بايلانىستى كونسۋلتاتسيالار الۋ ءۇشىن «1477» ءنومىرى بويىنشا قازاقستان ۇلتتىق بانكىنىڭ بايلانىس ورتالىعىنا حابارلاسا الادى. ال قارجىلىق قىزمەتتەر الۋ كەزىندە قۇقىعىم بۇزىلدى دەپ ەسەپتەيتىن ازاماتتار قر قارجى نارىعىن رەتتەۋ جانە دامىتۋ اگەنتتىگىنە А15С9Т5، الماتى قالاسى، كوكتەم-3 شاعىن اۋدانى، 21 ءۇي مەكەنجايى بويىنشا جازباشا ارىز تۇسىرە الادى. سونداي-اق، Egov.kz ەلەكتروندىق ۇكىمەت پورتالى ارقىلى ارىزدانۋعا بولادى. قارجى رەتتەۋشىسىنە ءوتىنىش جازۋ بويىنشا كونسۋلتاتسيالار الۋ ءۇشىن سالىمشىلار «1459» ءنومىرى بويىنشا اگەنتتىكتىڭ call-ورتالىعىنا قوڭىراۋ شالۋعا نەمەسە «Fingramota Online» موبيلدىك قوسىمشاسى ارقىلى سۇراقتارىن قويا الادى. سونداي- اق موبيلدىك قوسىمشانىڭ ۆەب-نۇسقاسى قولجەتىمدى.

ەستەرىڭىزگە سالا كەتەيىك، بانكتەر سىيلىقاقى تولەۋگە وتىنىشتەردى بەس اي بويى - 2022-جىلدىڭ قىركۇيەگىنەن 2023-جىلدىڭ اقپانىنا دەيىن قابىلدادى. وتىنىشتەردى قابىلداۋ اعىمداعى جىلدىڭ 10- اقپانىندا اياقتالعان بولاتىن.