قازاقستاندا دەپۋتاتتىق كورپۋس جاسارىپ كەلەدى – ش ى ۇ

استانا. قازاقپارات - شانحاي ىنتىماقتاستىق ۇيىمى باس حاتشىسىنىڭ ورىنباسارى گريگوري لوگۆينوۆ ەلىمىزدەگى سايلاۋ بارىسىن باقىلاۋداعى اتالعان ۇيىمنىڭ ميسسياسى تۋرالى بايانداپ بەردى، دەپ حابارلايدى قازاقپارات ءتىلشىسى.

«ءبىزدىڭ ميسسيا قازاقستانداعى سايلاۋ بارىسىن بۇعان دەيىن دە باقىلاپ كەلدى. باقىلاۋ بويىنشا تاجىريبە بار. بۇل جولى دا ۇلكەن جاۋاپكەرشىلىكتى سەزىنىپ وتىرمىز. شىۇ بايقاۋشىلارى وتكەن جىلى قاراشادا وتكەن پرەزيدەنت سايلاۋى بارىسىن دا قاداعالادى. بۇل جولعى سايلاۋ قازاقستان پرەزيدەنتى جاريالاعان قوعامدىق- ساياسي جۇيەنى جاڭارتۋ كۋرسى اياسىندا جاڭا مودەل بويىنشا جۇزەگە اسىرىلماق. ءبىز وسك باسشىسى نۇرلان ابدىروۆپەن جان- جاقتى جانە مازمۇندى اڭگىمە وربىتتىك. ءبىز قازاقستاندىقتاردىڭ قوناقجايلىلىعىن سەزىندىك. مىندەتتەرىمىزدى ورىنداۋ ءۇشىن قولايلى جاعداي جاسالاتىنىنا سەنىمدىمىز»، - دەدى گريگوريي لوگۆينوۆ ورتالىق سايلاۋ كوميسسياسىندا وتكەن بريفينگىدە.

ونىڭ ايتۋىنشا، 19 -ناۋرىزداعى سايلاۋ بارىسىن ش ى ۇ اتىنان 18 بايقاۋشى قاداعالايدى.

«قازاقستاندا ءماجىلىس پەن ءماسليحاتتار دەپۋتاتتىعىنا ۇمىتكەرلەردىڭ ورتاشا جاسى 47 دەن تومەن. ياعني، دەپۋتاتتىق كورپۋستىڭ جاسارىپ كەلە جاتقانىن بىلدىرەدى. بۇل قازاقستاننىڭ ودان ءارى دامۋىنا جاڭا دەم بەرەتىنى ءسوزسىز. قازاقستان حالقىنا تابىس تىلەيمىن»، - دەيدى ول.

«ءبىز ەشقاشان ەلدەردىڭ زاڭناما اكتىلەرى جانە سايلاۋ جۇيەسىنە قاتىستى باعا بەرمەيمىز. شانحاي ىنتىماقتاستىق ۇيىمى ۇستانىمدارىنىڭ ءبىرى - ەلدەردىڭ ىشكى ىسىنە ارالاسپاۋ. ءار حالىقتىڭ مادەني جانە قوعامدىق-ساياسي قۇرىلعى جۇيەسى بويىنشا تاڭداۋى مەن ەگەمەندىگىن قۇرمەتتەۋ»، - دەپ تولىقتىردى ش ى ۇ باسشىسىنىڭ ورىنباسارى.