مەملەكەت باسشىسى ب ۇ ۇ- نىڭ ادام قۇقىقتارى جونىندەگى جوعارعى كوميسسارىمەن كەزدەستى
قاسىم-جومارت توقايەۆ فولكەر تيۋرككە ءىلتيپات بىلدىرە وتىرىپ، ونىڭ بۇل ساپارى قازاقستان مەن ب ۇ ۇ- نىڭ ادام قۇقىقتارى جونىندەگى جوعارعى كوميسسارىنىڭ باسقارماسى اراسىنداعى ىنتىماقتاستىقتى ودان ءارى نىعايتۋ ءۇشىن ماڭىزدى ەكەنىن اتاپ ءوتتى. مەملەكەت باسشىسى ەلىمىزدىڭ ادام قۇقىقتارىن قورعاۋ ماسەلەسى بويىنشا تىعىز قارىم-قاتىناس ورناتۋعا جانە اقپارات الماسۋعا دايىن ەكەنىن مالىمدەدى.
پرەزيدەنتتىڭ ايتۋىنشا، قازاقستان ب ۇ ۇ- نىڭ نەگىزگى كونۆەنتسيالارى مەن حاتتامالارىنىڭ ءبارىن راتيفيكاتسيالادى جانە ۇلتتىق دەڭگەيدە ادام قۇقىقتارى سالاسىندا ءوزارا بەلسەندى ءىس-ارەكەت مەحانيزمدەرى جاسالدى.
قاسىم-جومارت توقايەۆ فولكەر تيۋرككە ەلىمىزدە جۇرگىزىلىپ جاتقان رەفورمالار جونىندە دە ايتتى. مەملەكەت باسشىسى «كۇشتى پرەزيدەنت - ىقپالدى پارلامەنت - ەسەپ بەرەتىن ۇكىمەت» قاعيداتىن جۇزەگە اسىرۋ اياسىندا قولعا الىنعان قوعامدىق-ساياسي جاڭعىرۋ باستاماسىن بىلتىرعى جالپىۇلتتىق رەفەرەندۋم مەن پرەزيدەنت سايلاۋى كەزىندە قازاقستان حالقى قولداعانىن جەتكىزدى.
ءوز كەزەگىندە فولكەر تيۋرك قوناقجايلىق كورسەتكەنى ءۇشىن قاسىم-جومارت توقايەۆقا العىس ايتتى جانە وسى جىلداردا ادام قۇقىقتارى ماسەلەسى بويىنشا ۇيىمنىڭ قازاقستان بيلىگىمەن اراداعى قالىپتاسقان قارىم-قاتىناسىنا وڭ باعا بەردى.
سونداي-اق جوعارعى كوميسسار پرەزيدەنتتىڭ باستاماسىمەن ەلىمىزدىڭ قوعامدىق-ساياسي ومىرىندە جۇرگىزىلىپ جاتقان وزگەرىستەردىڭ ۋاقتىلى قولعا الىنعانىن اتاپ ءوتتى.
«مەن سوڭعى جىلدارى ءسىزدىڭ ەلىڭىزدە بولىپ جاتقان وقيعالاردى باقىلادىم. ءبىز ءۇشىن ازاماتتاردىڭ قۇقىقتارىن قورعاۋ ماسەلەسى رەفورمالاردىڭ اجىراماس بولىگى بولعانى وتە ماڭىزدى. ويتكەنى ەلدىڭ بولاشاعى وسىعان بايلانىستى. ءاربىر ەلدىڭ كەلەشەگى بىرىككەن ۇلتتار ۇيىمى مەن بۇكىل الەم سۇيەنەتىن ىرگەلى قاعيداتتارعا نەگىزدەلۋگە ءتيىس دەپ ويلايمىز. بيىل ادام قۇقىقتارىنىڭ جالپىعا بىردەي دەكلاراتسياسىنىڭ قابىلدانعانىنا 75 جىل تولادى. ءبىز بۇل اتاۋلى داتانى الەمدە قالىپتاسقان قايشىلىقتاردى ەڭسەرۋ مۇمكىندىگى رەتىندە قاراستىرعىمىز كەلەدى»، - دەدى فولكەر تيۋرك.