ءبىز ءۇشىن قازاقستانداعى سايلاۋ تاجىريبەسى قىزىق - بەلارۋس وكىلى
بۇل تۋرالى ۇجىمدىق قاۋىپسىزدىك شارتى ۇيىمىنىڭ الەۋمەتتىك-ەكونوميكالىق ماسەلەلەر جونىندەگى تۇراقتى كوميسسياسىنىڭ ءتوراعاسى، بەلارۋس رەسپۋبليكاسى ۇلتتىق جينالىسى وكىلدەر پالاتاسىنىڭ قاۋىپسىزدىك جونىندەگى تۇراقتى كوميسسيا ءتوراعاسىنىڭ ورىنباسارى الەكساندر ماركيەۆيچ ايتتى، دەپ حابارلايدى قازاقپارات ءتىلشىسى.
«قازىر قازاقستاندا ساياسي جۇيكەنى جاڭعىرتۋ پروتسەسى ءجۇرىپ جاتىر. بۇل جولدا وتە كوپ شارۋا تىندىرىلدى. قازىر پارلامەنتتىڭ تومەنگى سايلاۋى جاڭا ەرەجەمەن، جاڭا شارتتارمەن وتكەلى جاتىر. ءبىز ساياسي پارتيالاردىڭ سايلاۋ پروتسەسىنە بەلسەندى قاتىسۋى ءۇشىن ۇلكەن جۇمىس جۇرگىزىلگەنىن كوردىك. پارلامەنت پالاتاسىنىڭ قۇرىلۋى ارالاس جۇيە بويىنشا وتەدى. بىزگە كوپشىلىك وكرۋگتەر بويىنشا قانشا كانديدات تىركەلگەنى تۋرالى ساندار كورسەتكەن كەزدە تىركەۋدەن وتكەن كانديداتتاردىڭ سانىنا تاڭ قالدىق. ءبىز قاراپايىم حالىقتىڭ دا، كانديداتتاردىڭ دا ەلدەگى ساياسي ومىرگە قاتىسۋعا ىنتالى ەكەنىن كورىپ وتىرمىز»، - دەدى ول ورتالىق سايلاۋ كوميسسياسىندا وتكەن بريفينگىدە.
حالىقارالىق توپتىڭ ۇيلەستىرۋشىسى قازاقستاننىڭ بۇل تاجىريبەسى ءجىتى زەردەلەنىپ، بەلارۋس ەلىندەگى ءبىرىڭعاي داۋىس بەرۋ كۇنىن وتكىزۋ كەزىندە ەسكەرىلەتىنىن اتاپ ءوتتى. ايتۋىنشا، ول سايلاۋدا دا بەلارۋس پارلامەنتىنىڭ تومەنگى پالاتاسى مەن جەرگىلىكتى كەڭەس دەپۋتاتتارى سايلانادى.
ۇقشۇ ميسسياسىنىڭ قۇرامىندا ارمەنيا، بەلارۋس، رەسەي، تاجىكستان، قىرعىزستان وكىلدەرى بار.