قازاقستان بىلتىر ۋران ساۋداسىنان قانشا تابىس تاپتى

استانا. قازاقپارات – ب ا ق وكىلدەرىنىڭ قاتىسۋىمەن وتكەن بريفينگىدە «قازاتومونەركاسىپ» ۇ ا ك» ا ق باسقارما ءتوراعاسى ەرجان مۇقانوۆ بىلتىر كومپانيا ۋران ساۋداسىنان قانشا تابىس تاپقانىن ايتتى، دەپ حابارلايدى قازاقپارات ءتىلشىسى.

«وتكەن جىلدىڭ قورىتىندىسى بويىنشا كومپانيانىڭ شوعىرلاندىرىلعان كىرىسى العاش رەت 1 تريلليون تەڭگەنى قۇراپ، 2021-جىلمەن سالىستىرعاندا %45 ءوستى. وپەراتسيالىق پايدا 456 ميلليارد تەڭگەگە جەتىپ، 2021-جىلمەن سالىستىرعاندا %91 ۇلعايدى. بۇل ءونىم ساتۋدىڭ ورتاشا باعاسىنىڭ وسۋىمەن بايلانىستى بولدى. ال كومپانيانىڭ تازا پايداسى - 473 ميلليارد تەڭگە. بۇل الدىنعى جىلداعى كورسەتكىشتەن %115 كوپ»، - دەپ كومپانيانىڭ ەسەبىن جاريالادى ەرجان مۇقانوۆ.

سونىمەن قاتار ول كەلەر جىلدىڭ ورتاسىندا تۇركىستان وبلىسىندا كۇكىرت قىشقىلى زاۋىتىنىڭ قۇرىلىسى باستالاتىنىن ءمالىم ەتتى.

بۇعان قوسا، وتكەن جىلى ەلىمىزدە ۋران ءوندىرىسى %3 تومەندەگەنى، بىلتىر قازاقستان قىتايعا 30 توننادان استام تومەن بايىتىلعان ۋران ەكسپورتتاعانى ايتىلدى.