تۇركىستان وبلىسىندا سالىناتىن كۇكىرت زاۋىتىڭ قۇرىلىسى قاشان باستالادى

استانا. قازاقپارات - «قازاتومونەركاسىپ» ۇ ا ك» ا ق باسقارما ءتوراعاسى ەرجان مۇقانوۆ تۇركىستان وبلىسىندا بوي كوتەرەتىن كۇكىرت قىشقىلىن وندىرەتىن زاۋىتتىڭ قۇرىلىسى قاشان باستالاتىنىن ايتتى، دەپ حابارلايدى قازاقپارات ءتىلشىسى.

«بۇل جوبا قازىرگى ۋاقىتتا تەحنيكالىق- ەكونوميكالىق نەگىزدەمە دەڭگەيىندە تۇر. ءبىز وسى جىلدىڭ ورتاسىندا جوبالاۋ- سمەتالىق قۇجاتتامانى ازىرلەۋدى جوسپارلاپ وتىرمىز. قۇرىلىس كەلەر جىلدىڭ ورتاسىندا باستالۋى مۇمكىن. جالپى، بۇل جوبانى 2025 -جىلدىڭ سوڭىنا دەيىن اياقتاپ، 2026 -جىلى تولىق وندىرىستىك قۋاتتا جۇمىس ىستەيدى دەپ جوسپارلاپ وتىرمىز»، - دەدى ەرجان مۇقانوۆ ب ا ق وكىلدەرىنىڭ قاتىسۋىمەن وتكەن باسپا ءسوز ءماسليحاتىندا.

ونىڭ ايتۋىنشا، زاۋىت 800 مىڭ توننا كۇكىرت قىشقىلىن وندىرۋگە قاۋقارلى بولادى.

«وسى زاۋىت ىسكە قوسىلعاندا 500 گە جۋىق جاڭا جۇمىس ورنى قۇرىلادى. رەسپۋبليكالىق بيۋدجەتكە تۇسەتىن تولەمدەر 4 ميلليارد تەڭگە دەڭگەيىنە جەتەدى. قازىرگى ۋاقىتتا تەحنيكالىق- ەكونوميكالىق نەگىزدەمەنى ازىرلەۋ اياقتالىپ قالدى. ونىڭ ىقتيمال قۇنى وسى نەگىزدەمەدەن كەيىن بەلگىلى بولادى. ءبىز جۇمىسقا جەكە ينۆەستوردى تارتۋدى جوسپارلاپ وتىرمىز. قازىرگى ۋاقىتتا ينۆەستوردىڭ قازاقستاننان نەمەسە شەتەلدەن بولاتىنى انىقتالمادى. دەگەنمەن زاۋىت ءوز قاراجاتىمىز ەسەبىنەن سالىنبايدى»، - دەپ تۇيىندەدى ەرجان مۇقانوۆ.