ورازانى ءبىرىنشى رەت ۇستاعاندا نەنى ەسكەرۋ كەرەك؟

استانا. قازاقپارات - رامازان ايى دا قول بۇلعاپ شاقىرىپ تۇر! ال ءسىز بيىل العاش رەت ورازا ۇستاماقسىز.

ساناڭىزدى الۋان ءتۇرلى ساۋالدار بيلەپ، قوبالجىپ جۇرگەن شىعارسىز. سونىمەن بۇل تىعىرىقتان قالاي شىعۋعا بولادى؟ ورازا ۇستايمىن دەپ نيەت ەتكەندەرگە مۇنداي كەڭەستى muslim.kz باسىلىمى.

1. مىقتى نيەت.رامازان ورازاسى كەيبىر قانداستارىمىزدىڭ ايتاتىنىداي، ءۇش كۇن باسىندا، ءۇش كۇن ورتاسىندا جانە ءۇش كۇن سوڭىندا ەمەس. ورازا - وتىز كۇن (كەيدە ايدىڭ ەرتە تۋۋىنا بايلانىستى 29 كۇن بولۋى مۇمكىن). سوندىقتان دا، ەڭ الدىمەن، وتىز كۇن ورازانى اللا ريزالىعى ءۇشىن، ۇزبەي ۇستاۋعا ىشتەي نيەتىڭىزدى بەكەمدەپ، نىقتاپ الىڭىز. «امالدار نيەتكە بايلانىستى»، - دەيدى پايعامبارىمىز (س. ع. س. ).

2. كەرەكتى مالىمەت. ەكىنشىدەن، ورازانىڭ نەگىزگى شارت-تالاپتارىمەن قوسا، ورازانى بۇزاتىن جانە بۇزبايتىن جاعدايلاردى ءبىلىپ العانىڭىز دۇرىس. قازىرگى تاڭدا اللاعا شۇكىر، انا تىلىمىزدە جارىق كورگەن مالىمەتتەر بارشىلىق. ودان قالا بەردى، سايتتارعا تىكەلەي سۇراق جولداپ، بىلمەي تۇرعان نارسەڭىزدىڭ جاۋابىن الۋ مۇمكىندىگى قاراستىرىلعان. كەرەكتى مالىمەتتەرگە يە كىسىنىڭ ورازاسى ۋايىمسىز ءارى جەڭىل وتەدى. ۋايىمسىز دەۋىمنىڭ سەبەبى، الدەبىر جاساعان ارەكەت ورازانى بۇزدى ما، جوق پا دەپ، ناقتى بىلمەگەندىكتەن ورىنسىز ۋايىمعا بەرىلىپ جاتاتىندار بار. ال جەڭىل دەۋىمنىڭ ءمانى: ادەتتە ورازانى بۇزبايتىن، ورازاعا زيانى جوق نارسەلەردەن شامادان تىس ساقتانىپ، ىڭعايسىز جاعدايلارعا تاپ بولۋى مۇمكىن. مىسالى، اۋىزداعى سىلەكەي مەن تۇكىرىك ورازانى بۇزادى دەپ جۇرگەن ادام، كۇنى بويى تۇكىرۋمەن بولادى.

3. سارەسىگە تۇرۋ. لاج بولسا، سارەسىنى جىبەرمەڭىز. پايعامبارىمىز (س. ع. س.): «سارەسىدە بەرەكە بار»، [1] - دەگەن. سارەسىدە تابەتىڭىز تارتپاي تۇرسا، تىم بولماعاندا سۋ ىشكەن جاقسى. وسىلايشا، ءوزىڭىزدىڭ دەنەڭىزدى قاجەتتى سۇيىقتىقپەن قامتاماسىز ەتكەن بولاسىز. ونىڭ ۇستىنە، سارەسى - ادامعا رۋحاني دەمەۋ.

4. اس ءمازىرى. اس مازىرىنە كوپشىلىگىمىز ءمان بەرمەيتىنىمىز راس. كۇنى بويى اش جۇرگەن ادامنىڭ اس مازىرىنە ءمان بەرۋى دە قيىن شىعار. دەگەنمەن بىلە جۇرگەنىمىز ارتىق ەتپەيدى. مەديتسينا ماماندارىنىڭ ايتۋىنشا، مايلى ءارى مايعا قۋىرىلعان تاعامدى جانە قۇرامىندا قانتى كوپ ءدامدى ازايتۋ كەرەك. سونداي-اق سارەسىدە ارتىق تاماق جەۋدەن، شامادان تىس سۋسىن ىشۋدەن ساقتانۋ ماڭىزدى. ولاي ەتپەگەن جاعدايدا، اعزاداعى مينەرالدى تۇزدار تەز شىعىپ، دەنەنىڭ جىلدام السىرەۋىنە الىپ كەلەتىنگە ۇقسايدى.

5. اۋىز اشار ءساتى كەلگەندە بىردەن اسقا وتىرماعان جاقسى. الدىمەن قول قۋسىرىپ تىلەگىڭىزدى تىلەپ، سۋمەن نەمەسە قۇرمامەن اۋىز اشىپ، ودان سوڭ نامازعا تۇرىڭىز. ناماز وقىپ بولام دەگەنىڭىزشە، اسقازانىڭىزعا ءنار بارىپ، ءارى قاراي تاماق قابىلداۋعا دايىن بولادى. جانە اۋىز اشقاننان، ۇيىقتاعانعا دەيىنگى ارالىقتا كوبىرەك سۋ ىشكەن جاقسى.

6. كۇنالى ىستەردەن الشاق ءجۇرۋ. اۋىز بەكىتكەن كىسى ءتۇرلى كۇنالى ىستەردەن ءوزىن تىيۋعا ءتيىس. عايبات، وسەك- ايان، ۇرىس- كەرىس ت. ب. ابەس ادەتتەردەن ارىلۋى شارت.

7. ورازانى بۇزاتىن جاعدايلاردان نە اۋزى بەرىك كەزدە ماكرۋھ سانالعان ارەكەتتەردەن بويدى اۋلاق ۇستاۋ ءلازىم.

8. رامازان ايىن ءتيىمدى پايدالانعان ءجون. ناماز وقىماي جۇرگەندەر بولسا، ەڭ ءبىرىنشى ناماز وقىپ باستاعاندارى دۇرىس. ودان قالا بەردى، بوس ۋاقىتتارىمىزدا قۇران وقىپ ۇيرەنۋگە، جاڭا سۇرە- اياتتار جاتتاۋعا، ءدىني ءبىر ادەبيەت (مىسالى، پايعامبارىمىزدىڭ ءومىر بايانى جايىندا) وقىپ شىعۋعا تىرىسقانىمىز ابزال.

اللا تاعالا بارشامىزدىڭ ۇستاعان ورازالارىمىزدى كەم-كەتىگىمەن قابىل ەتىپ، و دۇنيەدە «رايان» ەسىگىنەن كىرۋدى جازسىن. پايعامبارىمىز (س. ع. س.) بىلاي دەپ ايتقان:

«شىنىندا پەيىشتىڭ «رايان» دەگەن ەسىگى بار. قيامەت كۇنى ودان ورازا ۇستاۋشىلار عانا كىرەدى. وزگەلەر ول ەسىكتەن كىرمەيدى. سول كۇنى (پەرىشتەلەر): «ورازا ۇستاۋشىلار قايدا؟» - دەپ سۇرايدى. ورازا ۇستاۋشىلار تۇرىپ، ەسىكتەن كىرگەننەن كەيىن ەسىك جابىلىپ، ودان باسقا ەشكىم كىرمەيدى».