الماتى وبلىسىندا جاڭا ارنايى ەكونوميكالىق ايماعى قۇرىلدى

None
استانا. قازاقپارات - ۇكىمەت قاۋلىسىمەن 2048 -جىلعا دەيىنگى كەزەڭگە الماتى وبلىسىندا اۋدانى 30 مىڭ گەكتار G4 City ارنايى ەكونوميكالىق ايماعى (ا ە ا) قۇرىلدى.

بۇل تۋرالى قازاقپارات ۇكىمەتتىڭ رەسمي سايتىنا سىلتەمە جاساپ حابارلايدى.

ەكونوميكالىق ايماق الماتى قالاسىنىڭ سولتۇستىگىندە، ۇزىندىعى 80 شاقىرىم A3 تاس جولىنىڭ (الماتى - قونايەۆ) بويىندا ورنالاسقان، ونىڭ اۋماعىندا ارنايى قۇقىقتىق رەجيم بەلگىلەنەدى. جاڭا ەكونوميكالىق ايماق G4 City ينتەگراتسيالانعان قالاسىن قۇرۋعا وتاندىق جانە شەتەلدىك ينۆەستيتسيالاردى تارتۋ ءۇشىن قولايلى كليمات ۇسىنادى دەگەن جوسپار بار، بۇل ءوز كەزەگىندە بۇكىل ايماقتىڭ دامۋىنا جاڭا سەرپىن بەرەدى.

ماسەلەن، 2048 -جىلعا دەيىن ا ە ا شەڭبەرىندە شامامەن 3,7 تريلليون تەڭگە كولەمىندە ينۆەستيسيا تارتۋ، قۇنى 17 تريلليون تەڭگەدەن استام قىزمەتتەر مەن تاۋارلار ءوندىرۋ، سونداي-اق 60 مىڭعا جۋىق جۇمىس ورنىن قۇرۋ جوسپارلانىپ وتىر. جالپى، جاڭا ەكونوميكالىق ايماقتىڭ قىزمەتى G4 City-دە تۋريزم، مەديتسينا، كولىك- لوگيستيكا، ءبىلىم بەرۋ جانە مادەني-دەمالىس سالالارى ينفراقۇرىلىمىنىڭ جەدەل دامۋىنا سەپتىگىن تيگىزەدى. سونىمەن قاتار، ا ە ا رەجيمى نىسانداردى سالۋعا كەتەتىن نەگىزگى شىعىنداردى ازايتۋعا مۇمكىندىك بەرەدى.

ەسكە سالا كەتەيىك، پرەزيدەنت قاسىم-جومارت توقايەۆ الماتى وبلىسىنا جۇمىس ساپارى بارىسىندا G4 City جوباسىمەن تانىسقان بولاتىن. G4 City دامۋ تۇجىرىمداماسىنا سايكەس ينتەگراتسيالانعان قالا ءتورت اۋداننان تۇرادى: Gate City - ىسكەرلىك جانە قارجىلىق ورتالىق، Golden District - ءبىلىم بەرۋ جانە مەديتسينالىق حابى، Growing District - يننوۆاتسيالىق-يندۋستريالىق جانە ساۋدا-لوگيستيكالىق ايماق، Green District - تۋريستىك كلاستەر. G4 City دە شامامەن 2,2 ميلليون ادام تۇرادى دەپ بولجانىپ وتىر.

قاۋلى قول قويىلعان كۇنىنەن باستاپ كۇشىنە ەنەدى.


سوڭعى جاڭالىقتار