س ق و پوليتسەيلەرى وقۋشىلارعا جول رەتتەۋشىسىنىڭ بەلگىلەرىن ۇيرەتىپ جاتىر - فوتو

پەتروپاۆل. قازاقپارات - سولتۇستىك قازاقستان وبلىسىندا «بالا جانە باعدارشام» اكسياسى اياسىندا پوليتسەيلەر وقۋشىلاردى جول رەتتەۋشىسىنىڭ قيمىلدارىن تۇسىنۋگە ۇيرەتىپ جاتىر، دەپ حابارلايدى قازاقپارات ءتىلشىسى.

س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، كوكتەمگى دەمالىس جانە جاز مەزگىلى قارساڭىندا وڭىردە ىشكى ىستەر مينيسترلىگىنىڭ باستاماسىمەن «بالا جانە باعدارشام» رەسپۋبليكالىق اكتسياسى ءوتىپ جاتىر. ءىس-شارا اياسىندا پوليتسەيلەر بالالار مەن ولاردىڭ اتا- انالارىمەن جول قوزعالىسىن ءتۇسىندىرۋ بويىنشا جۇمىستار اتقارىپ جاتىر.

وعان سەبەپ تە جوق ەمەس. س ق و-دا سوڭعى ەكى ايدا بالالاردىڭ قاتىسۋىمەن 5 جول-كولىك وقيعاسى تىركەلىپ، سالدارىنان ءبىر بالا مەرت بولدى، بەسەۋى جاراقات الدى.

پەتروپاۆلداعى № 17-ورتا مەكتەپتىڭ 5-سىنىپ وقۋشىلارى اكتسيا اياسىندا پوليتسيا رەتتەۋشىسىنىڭ قيمىلدارىن ءتۇسىنىپ ۇيرەندى.

جەرگىلىكتى پوليتسيا قىزمەتى باسقارماسىنىڭ ينسپەكتورى جانگەلدى قورجىبايەۆ بالالارعا جول قوزعالىسىن قامتاماسىز ەتۋدىڭ نەگىزگى ەرەجەلەرى تۋرالى تۇسىنىكتى ەتىپ ايتىپ بەردى.

سونداي-اق كەزدەسۋ بارىسىندا وقۋشىلارعا تۇنگى ۋاقىتتا اتا-انا قاراۋىنسىز كوشەدە جالعىز جۇرۋگە بولمايتىندىعى، ۇساق بۇزاقىلىق ءۇشىن قانداي جازا قاراستىرىلعانى ايتىلدى.

«كۇننىڭ جىلۋىمەن كوشەدەگى كولىك اعىنى ارتا تۇسپەك، ال، كوكتەمگى، جازعى دەمالىستا اۋلالار مەن جولدارعا بالالار شىعادى. جول-كولىك وقيعالارىنىڭ الدىن الۋ ماقساتىندا ءبىز ۇستازدارمەن بىرگە وسىنداي پروفيلاكتيكالىق ءىس-شارالاردى وتكىزەمىز. بايقاعانىمىز، تەك بالالار عانا ەمەس، ەرەسەكتەر دە جولدا كۇتپەگەن مىنەز تانىتىپ، جول ەرەجەسىن بۇزادى. سوندىقتان اتا-انالاردى بالالارىنا ۇلگى بولىپ، جول ءتارتىبىن ساقتاۋدى شاقىرامىز»، - دەيدى س ق و پ د جەرگىلىكتى پوليتسيا قىزمەتى باسقارماسىنىڭ باستىعى ايدىن بايماتوۆ.

جالپى، جىل باسىنان بەرى وبلىستا 33 جول-كولىك وقيعاسى تىركەلدى، سالدارىنان 3 ادام قازا تاۋىپ، 62 ادام جاراقات الدى.

اۆتور

اقەركە داۋرەنبەك قىزى