بيىل تۇركىستاندا تۇركى مەملەكەتتەرى ۇيىمىنىڭ مەرەيتويلىق ءسامميتى وتەدى
بۇل تۋرالى ق ر پرەزيدەنتى قاسىم-جومارت توقايەۆ تۇركى مەملەكەتتەرى ۇيىمىنىڭ «اپات جانە توتەنشە جاعدايلار مەنەدجمەنتى، گۋمانيتارلىق كومەك» اتتى كەزەكتەن تىس سامميتىندە ءمالىم ەتتى، دەپ حابارلايدى قازاقپارات اقورداعا سىلتەمە جاساپ.
«بيىل قازان ايىندا كيەلى تۇركىستاندا ۇيىمنىڭ ونىنشى مەرەيتويلىق سامميتى وتەدى. سىزدەردى وسى القالى جيىنعا قاتىسۋعا شاقىرامىن.
بۇدان بولەك، كۇزدە ۇيىمعا ءتوراعالىق ەتۋ مىندەتى قازاقستانعا جۇكتەلەدى. سول كەزدە ءبىرقاتار ماڭىزدى ءىس-شارا ۇيىمداستىرىلاتىن بولادى»، - دەدى ق. توقايەۆ.
سونداي-اق مەملەكەت باسشىسى تۇركى الەمىنىڭ ەلدەرى ساياسي، ەكونوميكالىق جانە مادەني ىقپالداستىقتى جاڭا دەڭگەيگە كوتەرۋى قاجەت ەكەندىگىن اتاپ ءوتتى.
«قازىر گەوساياسي جاعداي كۇردەلى ەكەنىن بىلەسىزدەر. الەمدەگى ەكونوميكالىق احۋال دا ءماز ەمەس. وسىنداي قيىن كەزەڭدە تۇركى الەمى ءوزارا ىنتىماقتاستىعىن نىعايتا ءتۇستى. بۇل - وتە دۇرىس قادام.
ءبىزدىڭ ۇيىم سول ارقىلى حالىقارالىق دەڭگەيدە وزىندىك ورنى بار ەكەنىن كورسەتتى. ەلدەرىمىز ساياسي، ەكونوميكالىق جانە مادەني ىقپالداستىقتى جاڭا دەڭگەيگە كوتەرۋى قاجەت. بۇل - قازاقستاننىڭ سىرتقى ساياساتىنداعى باسىم باعىتتىڭ ءبىرى»، - دەدى پرەزيدەنت.