توقايەۆ تۇركياداعى ءزىلزالاعا قاتىستى: قۇتقارۋشىلاردى جىبەرىپ، اپات سالدارىن جويۋعا اتسالىسامىز
بۇل تۋرالى ق ر پرەزيدەنتى قاسىم- جومارت توقايەۆ بۇگىن انكارادا ءوتىپ جاتقان تۇركى مەملەكەتتەرى ۇيىمىنىڭ «اپات جانە توتەنشە جاعدايلار مەنەدجمەنتى، گۋمانيتارلىق كومەك» اتتى كەزەكتەن تىس سامميتىندە ايتتى، دەپ حابارلايدى قازاقپارات.
«بۇگىنگى باسقوسۋدىڭ «اپات جانە توتەنشە جاعدايلار مەنەدجمەنتى، گۋمانيتارلىق كومەك» دەگەن تاقىرىپتا ءوتۋى بەكەر ەمەس. قازىر جەر جۇزىندە تابيعي جانە تەحنوگەندىك اپاتتار كوبەيىپ جاتىر. بۇل جاعداي وتە وزەكتى حالىقارالىق ماسەلەنىڭ بىرىنە اينالدى.
وسىنداي كۇردەلى كەزەڭدە قازاقستان گۋمانيتارلىق شارالاردان شەت قالعان ەمەس. ەلىمىز تابيعي اپاتتان زارداپ شەككەن ەلدەرگە ۇنەمى قولداۋ كورسەتەدى»، - دەدى پرەزيدەنت.
سونداي- اق ق. توقايەۆ قازاقستاندىق قۇتقارۋشىلار تۇركيا ەلىنە ءزىلزالا سالدارىن جويۋعا كومەكتەسەتىنىن اتاپ ءوتتى.
«ءبىز قارجىلاي جانە تاۋار تۇرىندە گۋمانيتارلىق كومەك بەرۋمەن عانا شەكتەلىپ قالمايمىز. بۇدان بولەك، قۇتقارۋشىلاردى جىبەرىپ، اپات سالدارىن جويۋعا بەلسەنە اتسالىسامىز.
جالپى، تۇركى ەلدەرى توتەنشە جاعداي كەزىندە ءتيىمدى ارەكەت ەتە ءبىلۋى كەرەك. سونداي- اق، ۇيىم حاتشىلىعى جانە مۇشە مەملەكەتتەر اراسىنداعى بايلانىستاردى نىعايتا ءتۇسۋ قاجەت»،- دەدى پرەزيدەنت.