قارا شايعا نان باتىرىپ جەيدى: الماتى بالاباقشاسىن كوميسسيا تەكسەرەتىن بولدى

الماتى. قازاقپارات - الماتى قالاسىنداعى بالاباقشالاردىڭ بىرىندە بالالارعا ساپاسىز تاماق بەرىلەتىنى تۋرالى ۆيدەو جەلىگە تارادى، دەپ حابارلايدى قازاقپارات ءتىلشىسى.

ۆيدەو اۆتورىنىڭ ايتۋىنشا، ساپاسىز تاماق بەرەتىن بالاباقشا «مەملەكەتتىك» بولىپ تابىلادى.

«مۇندا بالالار قارا شايعا ناندى سالىپ ىشەدى. نەگە ءوز بالالارىنا مۇنداي تاماق بەرمەيدى»، - دەپ شاعىمداندى ۆيدەو اۆتورى. سونداي- اق ۆيدەو استىنداعى جازبادا بۇل قالاداعى №164 مەملەكەتتىك بالاباقشا ەكەنى جازىلعان.

اتالعان ماسەلەگە بايلانىستى الماتى قالاسىنىڭ ءبىلىم باسقارماسى تۇسىنىك بەردى.

«№164 بوبەكجاي- بالاباقشاسى» مەملەكەتتىك بالاباقشاسىندا بالالاردى تاماقتاندىرۋ ساپاسىز ۇيىمداستىرىلادى دەگەن كۇدىككە قاتىستى جان- جاقتى تەكسەرۋ جۇرگىزۋ ءۇشىن مونيتورينگىلىك توپ قۇرىلدى. 20-ناۋرىزعا دەيىن باقىلاۋ كوميسسياسى ءوز جۇمىسىن اياقتاۋى ءتيىس. ءقازىر الماتى قالاسى ءبىلىم باسقارماسىنىڭ قىزمەتكەرلەرى مەكتەپكە دەيىنگى ۇيىمعا كەتتى. تەكسەرۋ ناتيجەلەرى قوسىمشا حابارلاناتىن بولادى»، - دەلىنەدى ۆەدومستۆو حابارلاماسىندا.