مەكتەپ ديرەكتورلارىنىڭ جالاقىسىن دا وسىرەمىز - عاني بەيسەمبايەۆ

استانا. قازاقپارات - وقۋ-اعارتۋ ءمينيسترى عاني بەيسەمبايەۆ سەناتتىڭ جالپى وتىرىسىنان كەيىن مەكتەپتەگى باسشىلىق لاۋازىم يەلەرىنىڭ ايلىعى كوتەرىلەتىنىن ءمالىم ەتتى، دەپ حابارلايدى قازاقپارات ءتىلشىسى.

«ءسىزدىڭ الدىڭىزداعى ءمينيستردىڭ كەزىندە مۇعالىمدەردىڭ عانا ەمەس، ديرەكتورلار مەن ورىنباسارلارىنىڭ، وزگە دە مەكتەپ قىزمەتكەرلەرىنىڭ ايلىعى وسەتىنى ايتىلعان ەدى. سول ۋادە ورىندالماعانى تۋرالى شاعىمدار بار. ونىڭ سەبەبى نەگە بايلانىستى؟» دەپ سۇرادى جۋرناليست.

ءمينيستردىڭ ايتۋىنشا، بيىل مۇعالىمدەردىڭ ايلىعىن ارتتىرۋ شاراسى تولىق اياقتالعان.

ەندىگى كەزەكتە مەكتەپ باسشىلىعىنداعى لاۋازىم يەلەرىنىڭ ايلىعى وسپەك.

«مەملەكەت باسشىسىنىڭ 2019 -جىلى بەرگەن تاپسىرماسى بويىنشا، 2020 -جىلدان باستاپ مۇعالىمدەردىڭ ايلىعى جىل سايىن 25 پايىز كوتەرىلىپ وتىردى. بيىل تاعى 25 پايىز ارتىپ، ەكى ەسە كوتەرۋ تولىعىمەن اياقتالدى. كەلەسى باعىتتا مەكتەپ باسشىلارىنىڭ ايلىعىن دا كوتەرۋگە ءمان بەرۋىمىز كەرەك. بۇل باعىتتا دا وقۋ-اعارتۋ مينيسترىلىگى ءبىرشاما جۇمىس اتقارىپ جاتىر. پىسىقتاپ جاتىرمىز، بۇل وڭاي شارۋا ەمەس. بۇكىل وڭ-تەرىس تۇستارىن ەسەپتەۋ كەرەك. مىندەتتى تۇردە مەكتەپ باسشىلارىنىڭ ايلىعىن كوتەرۋ كەرەك. ءبىز ونى قولدايمىز. ويتكەنى وسى باعىتتا جۇمىس ىستەپ جاتىرمىز»، - دەدى عاني بەيسەمبايەۆ.