استانا اتاۋىنىڭ وزگەرۋىنە بايلانىستى ەلوردالىق كاسىپكەرلەرگە ميلليونداعان ايىپپۇل سالىنعان

استانا. قازاقپارات - قازاقستاندىق كاسىپكەرلەر استانا اتاۋى وزگەرۋىنە بايلانىستى ميلليونداعان ايىپپۇل ارقالادى.

تانىمال رەسەيلىك Wildberries ماركەتپلەيس جۇيەسىندە اقاۋ شىقتى. وتاندىق ساتۋشىلار وندا ءوز تاۋارلارىن ساتادى. 500 دەن اسا استانالىق قايدا جۇگىنۋ كەرەك ەكەنىن جانە ادىلدىككە قالاي قول جەتكىزۋ كەرەك ەكەنىن بىلمەيدى، - دەپ حابارلايدى «استانا» تەلەارناسى.

وسى قوسىمشا ارقىلى بيزنەسىن جۇرگىزگەن قازاقستاندىقتاردىڭ ايتۋىنشا، اقپاننىڭ سوڭىنان باستاپ Wildberries جارتى ميلليون جانە ودان دا كوپ ايىپپۇل سالا باستاعان. اشۋلانعان كاسىپكەرلەر استاناداعى قويمانىڭ الدىنا جينالىپ، نە ءۇشىن كىنالى ەكەنىن ءبىلۋ ءۇشىن كەلگەن. ولار سايتتىڭ تەحنيكالىق قولداۋ قىزمەتى جاۋاپ بەرمەيتىنىن، ال قارىزعا بايلانىستى ءارى قاراي جۇمىس ىستەۋ مۇمكىن ەمەس ەكەنىن جەتكىزدى.

«Wildberries ەسەپتەردە باسقا قويماعا جونەلتىلگەنىن جازادى. قانداي باسقا قويما؟ بىزدە ول بىرەۋ. ەشكىم ەشتەڭە بىلمەيدى. بىرەۋگە 20 مىڭ، بىرەۋگە ميلليون، بىرەۋگە 14 ميلليون ايىپپۇل كەلدى»، - دەيدى كاسىپكەر مارينا گونچارەنكو.

الايدا قازاقستاندىقتاردى كۇزەتشى رەسەيلىك كومپانيانىڭ قويماسىنا كىرگىزبەگەن. كۇزەتشىنىڭ ايتۋىنشا، باسشىلىق اڭگىمەلەسۋدەن باس تارتقان.

«قازاقستاندا ءبىزدى قورعايتىن قانداي دا ءبىر زاڭ جوق پا؟ ۇنەمى جەتىم بالالار سياقتىمىز»، - دەيدى كاسىپكەر زارينا تۋرگايەۆا.

زاڭگەر شىڭعىس تەمىر كومپانيانىڭ قازاقستاندا رەسمي وكىلدىگى جوق ەكەنىن ايتادى.

«ماسەلە مىنادا - قويمانى تاڭداۋ كەزىندە جۇيە نۇر-سۇلتان قويماسىن اۆتوماتتى تۇردە تاڭداعان، دەگەنمەن استانا قويماسىن تاڭداۋ قاجەت ەدى. بۇل - تەحنيكالىق ماسەلە. ەندى ماركەتپلەيس وسى ەسەپتەۋلەردى قايتا قاراۋعا دايىن ەكەنى تۋرالى اقپارات كەلىپ جاتىر. ماركەتپلەيستىڭ ۋادەلەرىنە كوپتەگەن ادام سىني تۇرعىدان قارايدى. ياعني، مەرەكەلەرگە جاقىن، مەرەكەلەردەن كەيىن اقشا ءتىپتى قايتارىلماۋى مۇمكىن»، - دەدى ول.

رەسەيدەگى جەرگىلىكتى ب ا ق مالىمەتىنشە، كومپانيانىڭ تاۋار بەرۋ پۋنكتتەرى جاپپاي جابىلىپ جاتىر، قىزمەتكەرلەر ايىپپۇل مەن جالاقى بويىنشا قارىزعا بايلانىستى ەرەۋىلگە شىعىپ جاتىر. مۇنى كورگەن قازاقستاندىق كاسىپكەرلەر دە الاڭداپ وتىر.

قازاقستاندىق كاسىپكەرلەردىڭ «ۆايلدبەريزگە» قاتىستى باسقا دا تالاپتارى بار. مىسالى، ولارعا ماركەتپلەيستەگى ىشكى جارناما قولجەتىمدى ەمەس. اسىرەسە، ساتۋشىلار قازاقستاندىق تاۋارلاردى رەسەيدىڭ، ارمەنيانىڭ جانە بەلارۋستىڭ كوپتەگەن ايماعىنىڭ تۇرعىندارى كورە المايتىنىنا نارازى. ايىپپۇل ارقالاعاندارعا سوتقا جۇگىنۋگە كەڭەس بەرىلدى.

«كەيبىر زاڭنامالىق اكتىلەرگە وزگەرىستەر، تولىقتىرۋلار ەنگىزۋ بويىنشا جۇمىستار جۇرگىزىلىپ جاتىر. ەلەكترون ساۋدا شەڭبەرىندە تۇتىنۋشىلاردىڭ قۇقىقتارىن قورعاۋ، سونداي-اق، قازاقستان رەسپۋبليكاسىنىڭ اۋماعىندا جۇمىس ىستەيتىن ساۋدا الاڭدارىنىڭ قىزمەتىن رەتتەۋ بولىگى بويىنشا»، - دەدى ق ر ي د م سيفرلاندىرۋ دەپارتامەنتى ديرەكتورىنىڭ ورىنباسارى رۋسلان ورازاليەۆ.

شەنەۋنىكتەردىڭ ايتۋىنشا، بۇل تۇزەتۋلەر قوعامدىق تالقىلاۋلاردان ءوتىپ، جاقىن ارادا ۇكىمەتتىڭ قاراۋىنا شىعارىلادى.