يندونەزيا استاناسى كەلەر جىلى نۋرسانتارا شاھارىنا كوشىرىلەدى
بۇل كادرلارعا قاراپ، مىنا جەردە قالا بولاتىنىنا ءازىر سەنۋ قيىن. الايدا يندونەزيا بيلىگىنىڭ جوسپارى زور. ولار كەلەر جىلى مۇندا جاڭا استانا بولاتىنىن ايتادى. نۋسانتارانىڭ قۇرىلىسى بىلتىر باستالعان. بۇگىنگە دەيىن شاھار ينفراقۇرىلىمى % 14- كە دايىن. قازىر مۇندا 7 مىڭعا جۋىق قۇرىلىسشى جۇمىس ىستەپ جاتىر. ازىرگە قالادا جاتاقحانا، تىكۇشاق الاڭى بار. جولدار دا سالىنعان. ەندى كەلەر جىلدىڭ كۇزىنە دەيىن پرەزيدەنت سارايى سەكىلدى ماڭىزدى عيماراتتاردىڭ قۇرىلىسى اياقتالۋى ءتيىس.
بامبانگ سۋسانتونو، نۋسانتارا استانالىق باسقارماسىنىڭ ءتوراعاسى:
- بۇل تەك ۇكىمەتتىك عيماراتتار ورنالاسقان قالا ەمەس، وزگەلەردىڭ دە ءومىر ءسۇرۋى ءۇشىن قولايلى مەكەن بولادى دەپ سەنەمىز. ول سونداي- اق تەز ءوسىپ- وركەندەيتىن مەگاپوليسكە اينالادى. نۋسانتارا - بۇل بولاشاقتىڭ قالاسى. ءبىز قازىرگى ماسەلەلەر تۋرالى عانا ەمەس، كەلەشەك جايلى ويلانۋىمىز كەرەك. ءسويتىپ، شاھار 2045-جىلعا تامان كومىرتەكتى بەيتاراپ بولادى.
استانانى كوشىرۋدىڭ قاجەتتىلىگى قانشا ەدى دەگەن ساۋال تۋىندايدى؟ ماسەلە يندونەزيانىڭ قازىرگى باس قالاسى - دجاكارتادا حالىق كوپ شوعىرلانعان. تۇرعىندار سانى 10 ميلليوننان اسادى. اۋاسى لاس شاھارلار تىزىمىنەن تۇسپەيدى. جەر سىلكىنىسى ءجيى بولىپ تۇرادى. ونىڭ ۇستىنە تەڭىز دەڭگەيى تەز كوتەرىلىپ بارادى. سوندىقتان دجاكارتا سۋ استىنا كەتۋى مۇمكىن. دەمەك بيلىك ويلانا كەلە استانانى باسقا ورىنعا كوشىرۋگە شەشىمىن قابىلداعان. نۋسانتارا فۋتۋريستىك جاسىل قالا بولادى. جاڭارتىلاتىن ەنەرگيا كوزدەرىنە ەرەكشە ءمان بەرىلەدى، - دەيدى بيلىك وكىلدەرى.
الايدا تابيعات جاناشىرلارى بۇل ەكولوگيالىق باستاما ەمەس، كەرىسىنشە قورشاعان ورتاعا زيانى زور ەكەنىن ايتادى. ويتكەنى مەگاپوليستىڭ قۇرىلىسىنا بايلانىستى تروپيكالىق ورماندار وتالىپ جاتىر. ونىڭ ۇستىنە جوبا ورانگۋتانگ سەكىلدى جانۋارلاردىڭ مەكەن ەتۋ ايماعى ارقىلى وتەدى.
دۆي ساۆۋنگ، ەكوبەلسەندى:
- قالا قۇرىلىسى جانۋارلارعا ارنالعان ءدالىز ارقىلى وتپەۋ كەرەكتىن. بۇل ءۇشىن الدىمەن ولاردى وزگە وڭىرگە كوشىرۋ قاجەت ەدى. الايدا بيلىك اسىعىستىق تانىتىپ، بۇل ماسەلە نازارسىز قالدى. قالانىڭ قۇرىلىسىنا بايىرعى حالىقتار دا قارسى. ويتكەنى كوبى تۇرىپ جاتقان جەرلەرىنەن ايىرىلىپ قالامىز با دەپ الاڭداۋلى. بيلىك وتەماقى بولادى دەيدى. الايدا جەر تەلىمى مۇرا رەتىندە قالىپ وتىرعان. سول سەبەپتى بايىرعى حالىقتاردىڭ كوبىندە رەسمي قۇجاتتارى جوق. ەندى وتەماقى الۋ جاعى قيىنداۋى مۇمكىن.
سيبۋكدين، يندونەزيا بايىرعى حالىقتارى قاۋىمىنىڭ جەتەكشىسى:
- ءبىزدىڭ جەردى تارتىپ الىپ جاتىر. بىزبەن اقىلداسىپ جاتقان ەشكىم جوق. ۇسىنىپ وتىرعان وتەماقىسى دا كوڭىلىمىزدەن شىقپاي وتىر. ءبىز اۋىلدى جەردە تۇرىپ ۇيرەنىپ قالعانبىز. كۇيەۋىم - ءومىر بويى فەرمادا ەڭبەكتەنگەن ادام. قالادا جۇمىس ىستەي المايدى. وندا نەمەن اينالىسادى؟
كوبى جاڭا مەگاپوليس قۇرىلىسى قوعامدىق تالقىعا سالىنبادى دەپ تە اشۋلى. ويتكەنى جۇرگىزىلگەن ساۋالناما ناتيجەلەرى كورسەتىپ وتىرعانداي، يندونەزيانىڭ قازىرگى استاناسى دجاكاراتا تۇرعىندارىنىڭ % 96- ءى باستاماعا قارسى. قالاي بولعاندا دا بيلىك جاڭا استانانى كەلەر جىلدىڭ 17-تامىزىندا اشۋدى جوسپارلاپ وتىر. سالتاناتتى شارا ەلدىڭ تاۋەلسىزدىك كۇنىنە ورايلاستىرىلعان. سول ۋاقىتقا دەيىن نەگىزى ۇكىمەتتىك عيماراتتار دايىن بولۋى ءتيىس. ءسويتىپ، 1-1,5 جىلدان كەيىن نۋسانتاراعا 16 مىڭ مەملەكەتتىك قىزمەتكەر كوشۋى كەرەك.