ەڭبەك ءمينيسترى ايەلدەردىڭ زەينەتكە ەرتە شىعۋىنا قاتىستى پىكىر ءبىلدىردى

استانا. قازاقپارات - بۇگىن سەناتتىڭ جالپى وتىرىسىندا دەپۋتاتتار ەڭبەك جانە حالىقتى الەۋمەتتىك قورعاۋ مينيسترىنەن تامارا دۇيسەنوۆادان ايەلدەردىڭ زەينەتكە شىعۋ جاسىن تومەندەتۋگە قاتىستى سۇراق قويدى، دەپ حابارلايدى قازاقپارات ءتىلشىسى.

«پرەزيدەنت قازاقستان حالقىنا جولداۋىندا زەينەتاقى جۇيەسىنىڭ تيىمدىلىگىن ارتتىرۋ بويىنشا جاڭا شارالار پاكەتىن ۇسىندى. ونىڭ ءبىرى - 2028-جىلعا دەيىن ايەلدەردىڭ زەينەت جاسىن 61 جاسقا دەيىن كوتەرۋدى توقتاتا تۇرۋ. بۇل قادام الەۋمەتتىك كودەكستە كورىنىس تاپتى.

كوروناۆيرۋس پاندەمياسىنىڭ ازاماتتارىمىزدىڭ دەنساۋلىعى مەن ءومىر ءسۇرۋ ۇزاقتىعىنا تەرىس اسەرىن ەسكەرىپ، وسى شارا قابىلدانعانى بەلگىلى. 2029-جىلدان باستاپ زەينەت جاسىن ۇلعايتۋ جوسپارلانىپ وتىر ما؟ ەگەر وسىلاي بولسا، قانداي جاعدايدا ەرتە زەينەتكە شىعۋعا بولادى. 58 جاستاعى ايەلدەردىڭ زەينەتكە شىعۋى تۋرالى نورمانى قايتارۋ قاراستىرىلا ما؟»، - دەپ سۇرادى سەناتور جانبولات جورگەنبايەۆ پالاتانىڭ جالپى وتىرىسىندا الەۋمەتتىك كودەكس جوباسىن تالقىلاۋ كەزىندە.

ءوز كەزەگىندە ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا كەلەر جىلدارى دەنساۋلىق ساقتاۋ سالاسىنا قاتىستى اۋقىمدى جوبا ىسكە اسىرىلاتىنىن ايتتى.

«شىنمەن دە، پاندەمياعا بايلانىستى ازاماتتارىمىزدىڭ دەنساۋلىعى، ءومىر ءسۇرۋ ۇزاقتىعىنا بايلانىستى (زاڭعا) وزگەرىستەر ەنگىزىلدى. وعان سايكەس، الەۋمەتتىك قامسىزداندىرۋ جۇيەسىنە دە وزگەرىستەر بار. مەملەكەت باسشىسىنىڭ تاپسىرماسىنا سايكەس، بيىل قاڭتاردان باستاپ زەينەت جاسى 61 جاس دەپ توقتادى. الداعى 5 جىلدا دەنساۋلىق ساقتاۋ سالاسىندا ۇلكەن ۇلتتىق جوبا جۇرگىزىلگەلى جاتىر. ونىڭ نەگىزگى ماقساتى - اۋىلداردا مەديتسينانى جاقسارتۋ، كوپسالالى اۋرۋحانالاردى كوبەيتۋ، ياعني مامانداندىرىلعان مەديتسينالىق كومەكتى ازاماتتارعا جەتكىزۋ، تەلەمەديتسينا، ەرتە سكرينينگ سياقتى ماسەلەلەردى قاراستىرۋ. وسى جۇمىستاردىڭ ناتيجەسىندە ادامداردىڭ ءومىر ءسۇرۋ جاسى ۇزارسا، وندا 2029-جىلدان كەيىن قايتا قارالادى»، - دەدى مينيستر.

سونىمەن قاتار ول ەلىمىزدەگى بۇل جاعداي ءدال وسىلاي قالسا نەمەسە كەرىسىنشە ناشارلاسا، وندا زەينەتكە شىعۋ جاسى قايتا قارالاتىنىن جەتكىزدى.

«جالپى، زەينەتكە ەرتە شىعۋ ماسەلەسى قولدانىستاعى زاڭدا بار. ەگەر انانىڭ 5 بالاسى بولسا، ول 53 جاستا زەينەتكە شىعا الادى. سەمەي يادرولىق پوليگونى ايماعىندا تۇرعان ازاماتتارعا قاتىستى نورمالار ەسكەرىلگەن. بۇدان بولەك، زەينەتاقى قورلارىندا زەينەتاقى اكتيۆى بولسا، 55 جاسىندا زەينەتاقى اننۋيتەتى ارقىلى شىعۋ قاراستىرىلعان. سونداي- اق مەملەكەت باسشىسىنىڭ تاپسىرماسى بويىنشا اۋىر جۇمىس ىستەيتەن ازاماتتاردىڭ زەينەت جاسىن، زەينەتاقىسىن قاراستىرۋ جونىندەگى ماسەلەسىن ءتيىستى جۇمىس توبى اتقارىپ جاتىر. جاقىندا بۇل جونىندە تۇجىرىمدامامىزدى بەرەمىز»، - دەدى ۆەدومستۆو باسشىسى.