ەلوردادا پىشاقتالعان مەشىت قىزمەتكەرىنىڭ جاعدايى وتە اۋىر

استانا. قازاقپارات - استاناداعى مەشىتتەردىڭ بىرىندە بىرنەشە جەرىنەن پىشاق سۇعىلعان ازاماتتىڭ جاعدايى وتە اۋىر، دەپ حابارلايدى قازاقپارات ءتىلشىسى.

قوعامدىق دەنساۋلىق ساقتاۋ باسقارماسى پاتسيەنتتىڭ قازىرگى جاعدايى تۋرالى اقپارات بەردى.

«14- ناۋرىزدا جەدەل جاردەم بريگاداسى ناۋقاستى 3№ كوپبەيىندى قالالىق اۋرۋحاناعا جەتكىزدى. پاتسيەنت بىرنەشە جەردەن پىشاق جاراقاتىن العان، جاعدايى اۋىر. ناۋقاسقا شۇعىل ەم جۇرگىزىلدى. قازىر ناۋقاستىڭ جاعدايى وتە اۋىر. پاتسيەنتتى امان الىپ قالۋ ماقساتىندا واريت جاعدايىندا ەم جالعاسىپ جاتىر»، - دەيدى ۆەدومستۆودان.

حابارلامادا ايتىلعانداي، ناۋقاسقا تولىق كولەمدە ەم كورسەتىلىپ جاتىر. سونداي-اق، بولعان جايتقا قاتىستى پوليتسيا دەپارتامەنتى تۇسىنىك بەردى.

«اتالعان فاكتى بويىنشا استانا قالاسى پوليتسيا دەپارتامەنتىنىڭ سارىارقا اۋداندىق پوليتسيا ءبولىمى سوتقا دەيىنگى تەرگەۋدى باستادى. بارلىق قاجەتتى ساراپتامالار تاعايىندالدى. ايىپتى وقيعا ورنىندا ۇستالدى. ول قازىر ۋاقىتشا ۇستاۋ يزولياتورىندا قاماۋدا»، - دەپ حابارلادى دەپارتامەنتتىڭ باسپا ءسوز قىزمەتى.

ق ر قىلمىستىق-پروتسەستىك كودەكسىنىڭ 201-بابىنا سايكەس سوتقا دەيىنگى تەرگەپ-تەكسەرۋ مەن وزگە دە دەرەكتەر جاريا ەتۋگە جاتپايدى.

بۇعان دەيىن قازاقستان مۇسىلماندارى ءدىني باسقارماسىنىڭ باسپا ءسوز حاتشىسى اعابەك قونارباي ۇلى وقيعاعا كۇدىكتى مەن ونىڭ ايەلى اراسىنداعى داۋ-جانجال سەبەپ بولعانىن حابارلاعان بولاتىن.