بوكستان ايەلدەر اراسىنداعى الەم چەمپيوناتى: باس باپكەر باستى قارسىلاستاردى اتادى

استانا. قازاقپارات - بۇگىن ءۇندىستاندا الاۋى تۇتاناتىن بوكستان ايەلدەر اراسىنداعى الەم چەمپيوناتى الدىندا قازاقستان ۇلتتىق قۇراماسىنىڭ باس باپكەرى ءشامىل سافيۋللين سپورتشىلارىمىزدىڭ باستى قارسىلاستارىن اتادى، دەپ حابارلايدى قازاقپارات ءتىلشىسى.

«ءبىزدىڭ باستى قارسىلاستارىمىز - ءۇندىستان، قىتاي، رەسەي جانە وزبەكستاننىڭ بوكسشى قىزدارى. ايەلدەر بوكسىندا ءبىز بۇرىن ەستىمەگەن كوپتەگەن ەل بار. قازىر بۇل سپورت، اسىرەسە، افريكا قۇرلىعىندا قارقىندى دامىپ كەلەدى»، - دەپ اتاپ ءوتتى ءشامىل سافيۋللين.

ول سونداي-اق، بۇل ءوزىنىڭ باس باپكەر رەتىندە ەكىنشى الەم چەمپيوناتى ەكەنىن، وقۋ-جاتتىعۋ جيىندارىن ءساتتى وتكىزگەنىن، جۇلدەلى ورىندارعا تالاسا الاتىنىن دا ايتتى.

«مەن ءۇشىن بۇل - ەكىنشى الەم چەمپيوناتى. جۇلدەلى ورىندارعا يە بولۋعا بارىنشا تىرىسامىز. ءبىزدىڭ سپورتشىلارىمىزدىڭ كوبى الەم رەيتينگىندە وندىقتا ەكەنىن اتاپ وتكىم كەلەدى. اتاپ ايتار بولسام، الۋا بالقىبەكوۆا ءوز سالماعىندا كوش باستاپ تۇر. ال جاينا شەكەربەكوۆا مەن كارينا يبراگيموۆا - ەكىنشى ورىندا»، - دەدى ول.

ايتا كەتەيىك، الەمدىك دودا 15-26- ناۋرىز ارالىعىندا ءۇندىستان استاناسى نيۋ-دەلي قالاسىندا وتەدى.

بۇگىن، ياعني 15- ناۋرىزدا تۋرنيردىڭ اشىلۋ سالتاناتى، جەرەبە تارتۋ ءراسىمى جانە سالماق ولشەۋ شاراسى ۇيىمداستىرىلادى. ال ەرتەڭ العاشقى ىرىكتەۋ سايىستارى باستالادى.

اتالعان دودادا ەل نامىسىن قورعايتىن بوكسشىلار:

- الۋا بالقىبەكوۆا (48 كەلى)،

- نازىم قىزايباي (50 كەلى)،

- جازيرا وراقبايەۆا (52 كەلى)،

- جاينا شەكەربەكوۆا (54 كەلى)،

- كارينا يبراگيموۆا (57 كەلى)،

- ريمما ۆولوسەنكو (60 كەلى)،

- ايدا ابىكەيەۆا (63 كەلى)،

- نادەجدا ريابەتس (66 كەلى)،

- مادينا نۇرشايەۆا (70 كەلى)،

- ۆالەنتينا حالزوۆا (75 كەلى)،

- فاريزا شولتاي (81 كەلى)،

- لياززات كۇنگەيبايەۆا (81 كەلىدەن جوعارى).

اۆتور كۇنسۇلتان وتارباي