پۋتينمەن كۇرەسىپ، جەڭگەن قازاق كىم؟
كورشى ەل باسشىسىنىڭ مىسىن باسقان بىلەكتى دە جۇرەكتى ازاماتتىڭ اتى-ءجونى - مۇرات كەرىمبايەۆ. 1950-جىلى سەمەي وبلىسىنىڭ (قازىرگى اباي) اقسۋات اۋدانىندا دۇنيەگە كەلگەن ول جاس كەزىندە سامبومەن اينالىسىپ، كەيىن سوت سالاسىندا ۇزاق جىل ەڭبەك ەتكەن. قازىر زەينەتكەرلىكتە. ول پۋتينمەن ەكى مارتە كەزدەسكەنىن ايتادى. العاشىندا بوز كىلەمدە بەلدەسكەن ەكەن.
«1968-جىلى قاراشادا اسكەرگە شاقىرىلدىم. سەمەيدىڭ پەداگوگيكالىق ينستيتۋتى جانىنداعى دەنەشىنىقتىرۋ كۋرسىندا ءبىر جىل وقىعانىم بار. كۇرەسكە بەيىم ەدىم. اسكەردە قارسىلاس شاق كەلتىرمەي ءجۇردىم. 58 كەلى سالماق دارەجەسىندە زابايكالە اسكەري ايماعىنىڭ چەمپيونى دا بولدىم. ول كەزدە سامبو كۇرەسىندە ەڭ جەڭىل سالماق 58 كەلى بولاتىن. سونداي جارىستاردىڭ بىرىندە رەسەيدىڭ بۇگىنگى پرەزيدەنتى ۆلاديمير پۋتينمەن جولىم ءتۇيىستى. ەكەۋمىز ءبىر توپقا ءتۇسىپپىز. پۋتين ول كەزدە ستۋدەنت ەدى. لەنينگرادتىڭ زاڭ فاكۋلتەتىندە وقىپ جۇرگەن كەزى ەكەن. ءبىراق ول كەزدە مەن ونىڭ زاڭ فاكۋلتەتىندە وقيتىنىن بىلگەن جوقپىن. كەيىن ءومىربايانىن وقىعان سوڭ عانا ءبىلدىم عوي. سول كۇنى ءبىر توپتا ءتورت اداممەن كۇرەستىم. سونىڭ ءبىرى پۋتين بولدى. شىنىمدى ايتسام، مەن ول كەزدە ونىڭ پۋتين ەكەنىن بىلگەن ەمەسپىن»، - دەپ ەسكە الادى سول شاقتى مۇرات كەرىمبايەۆ.
مۇرات كەرىمبايەۆ اسكەردەن كەلگەننەن كەيىن 1972-جىلى تومسكىدە سەرگەي ۆيتسەماننىڭ جۇلدەسى ءۇشىن سامبودان وتكەن بۇكىلوداقتىق تۋرنيرگە بارادى. پۋتينمەن سول جولى تاعى دا كەزدەسەدى.
«ول كەزدە ءبىر سالماقتا 66 ادام كۇرەستىك. ءبىر قىزىعى، بۇل جارىسقا پۋتين دە كەلىپتى. ءبىراق باسقا توپتا كۇرەستى. قاراپ قويامىن، ءتۇرى تانىس سەكىلدى. ايتپاقشى، سول كۇنى ونىمەن جاقىنىراق تانىسۋدىڭ ءساتى ءتۇستى. تانىستىرعان - اسكەردە بورىشىمىزدى بىرگە وتەگەن چەليابىلىك انوتولي بوندارەنكو دەگەن جىگىت. پۋتيندى تانيدى ەكەن. بۇرىن بىرگە كۇرەسكەن بە، الدە ءبىر جەردە بىرگە بولعان با، ايتەۋىر، ءبىرىن-ءبىرى جاقسى بىلەدى ەكەن. سول كورگەننەن كەيىن پۋتيندى 28 جىلدان كەيىن ءبىر-اق كوردىم عوي. ءوز ۇيىمدە، تەلەديداردان. جەڭگەڭ ەكەۋمىز تەلەديدار كورىپ وتىرعانبىز. تەلەديداردان رەسەيدەگى پرەزيدەنت سايلاۋىندا جەڭىسكە جەتكەن پرەزيدەنتتىڭ ۇلىقتاۋ ءراسىمى كورسەتىلىپ جاتتى. پرەزيدەنت كەلە جاتىر. قارايمىن، ءتۇرى تانىس سەكىلدى. ايەلىمە «مەن مىنانى تانيمىن عوي. مەنىمەن كۇرەسكەن بالۋان» دەيمىن. مىنە، وسىلايشا، پۋتينمەن كۇرەسكەنىمدى 28 جىلدان كەيىن ەسىمە ءتۇسىردىم»، - دەيدى ول.
ال كۇرەسكەندە كىم جەڭگەنىن مۇرات كەرىمبايەۆتىڭ ءوزى ايتتى.
«مەن ول كەزدە 20 جاستامىن. پۋتين 18 جاستا. ەكى جاس ۇلكەندىگىم بار. سوعان قاراماستان، پۋتين جاقسى كۇرەستى. ءبىراق مەن ۇپاي سانىمەن جەڭىسكە جەتتىم»، - دەيدى مۇرات كەرىمبايەۆ.