مەملەكەتتىك قىزمەتشىلەردى ارتىق جۇمساعان لاۋازىمدى تۇلعا ايىپپۇل ارقالايدى

استانا. قازاقپارات - ەلىمىزدە مەملەكەتتىك قىزمەتشىلەردى نەگىزگى مىندەتى مەن شامادان تىس جۇمساۋدىڭ جاۋاپكەرشىلىگى بۇرىننان بار.

بۇل تۋرالى مەملەكەتتىك قىزمەت ىستەرى اگەنتتىگى ءتوراعاسىنىڭ ورىنباسارى سالاۋات مۇكسىموۆ ايتىپ وتىر، دەپ حابارلايدى قازاقپارات ءتىلشىسى.

«مەملەكەتتىك قىزمەتشىنى نورمادان تىس جۇمساۋ جاعدايىنداعى جاۋاپكەرشىلىك جاڭاشىلدىق ەمەس. بۇرىننان بار. بۇگىندە مەملەكەتتىك قىزمەتشىنىڭ ارتىق جۇمىس ىستەۋى بويىنشا مونيتورينگ جۇرگىزۋ ءبىزدىڭ اگەنتتىكتىڭ قۇزىرەتىنە بەرىلگەن. ەگەر مونيتورينگ اياسىندا ارتىق جۇمساۋ فاكتىسى تىركەلسە، ول بويىنشا تەكسەرىس جۇرەدى. ونىڭ ناتيجەسىندە فاكتى راستالسا، ارينە جاۋاپكەرشىلىك قاراستىرىلعان»، - دەدى سالاۋات مۇكسىموۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ونىڭ ايتۋىنشا، كىنالىنى بىردەن جاۋاپقا تارتپاي، ەسكەرتۋ جاسالۋى دا مۇمكىن. ول جاعى بولعان فاكتىگە بايلانىستى.

«لاۋازىمدى تۇلعا بولسا، وعان 40 ا ە ك (ايلىق ەسەپتىك كورسەتكىش) كولەمىندە (شاشامەن 138 مىڭ تەڭگە) ايىپپۇل قاراستىرىلعان. جالپى، سوڭعى ۋاقىتتا مەملەكەتتىك قىزمەتشىلەردىڭ قالىڭ ورتادا وڭ ءيميدجىن قالىپتاستىرۋ جانە جاستار اراسىندا تارتىمدىلىعىن قامتاماسىز ەتۋدە قاجەتتى شارالار قابىلدانىپ جاتىر دەپ ەسەپتەيمىن. اتالعان پروبلەما بۇرىننان كەلە جاتىر. ءبىز ونى جاڭا زاڭ جوباسى اياسىندا شەشۋگە تىرىستىق»، - دەيدى ول.