تۇركىستاندا اكىمدەر مەن مەمقىزمەتشىلەر جۇمىسقا ۇلتتىق كيىم كيىپ كەلدى - فوتو

None
تۇركىستان. قازاقپارات - تۇركىستان وبلىسىندا ناۋرىز مەرەكەسى 10 كۇن بويى ەلدىڭ ەڭسەسىن كوتەرەتىن يگى ءىس- شارالارمەن ورنەكتەلىپ جاتىر.

بۇگىن، 15-ناۋرىزعا «ناۋرىز - ۇلتتىق ءداستۇر مەن مەيماندوستىق مەرەكەسى» دەگەن ايدار تاعىلىپ، بارلىق اۋدان- قالادا اكىمدىكتەر مەن مەملەكەتتىك مەكەمە قىزمەتكەرلەرى جۇمىسقا قازاقتىڭ ۇلتتىق كيىمىن كيىپ كەلدى، دەپ حابارلايدى قازاقپارات.


ۇلتتىق بولمىسىمىزدى، مادەنيەتىمىز بەن كيىمىمىزدى دارىپتەۋگە ارنالعان باستامانى تۇركىستان وبلىسىنىڭ اكىمى دارحان ساتىبالدى باستاپ بەردى.

ارىپتەستەرىن كەلە جاتقان ناۋرىز مەرەكەسىمەن قۇتتىقتاعان ءوڭىر باسشىسى وبلىس اكىمى اپپاراتىنىڭ كەزەكتى وتىرىسىن وتكىزدى.


- سىزدەردى ۇلتتىق كيىمدە كورىپ كوڭىلىم كوتەرىلىپ كەتتى. ۇلتتىق كيىم مەملەكەتتىك قىزمەتشىنىڭ بولمىسىن ەرەكشە ەتىپ كورسەتەدى. مادەنيەتىمىز بەن ءداستۇرىمىزدى قولداعان ءجون. ناۋرىز جاقسىلىعىمەن كەلىپ، حالقىمىزدىڭ بەرەكەسى ارتا بەرسىن، - دەگەن دارحان ساتىبالدى كۇن تارتىبىندەگى ماسەلەلەردى تالقىلاپ، تاپسىرما بەردى.

وبلىستىق باسقارما باسشىلارى مەن قىزمەتكەرلەرى، اۋدان، قالا اكىمدەرى مەن اكىمدىك ۇجىمدارى دا جۇمىسقا ۇلتتىق كيىممەن كەلىپ، باستاماعا قولداۋ كورسەتتى.

تۇركىستان ءوڭىرىنىڭ مەملەكەتتىك قىزمەتشىلەرى الداعى ۋاقىتتا دا ۇلتتىق كيىم كيۋدى داستۇرگە اينالدىرۋدى كوزدەپ وتىر.


سوڭعى جاڭالىقتار