قىتايداعى ەل چەمپيوناتىندا قانداسىمىز التىن مەدالدى جەڭىپ الدى
كونكيمەن جۇگىرۋدەن ەرلەر اراسىنداعى 5000 مەترگە كوپسايىس جارىسىندا شىڭجاڭ قۇراماسىنىڭ سپورتشىسى قاناعات مۇحامەت ۇلى التىن مەدالدى جەڭىپ الدى، دەپ حابارلايدى قازاقپارات قىتايدىڭ «ورتالىق حالىق راديوسى» اقپارتتىق پورتالىنا سىلتەمە جاساپ.
شارانىڭ ءبىرىنشى كۇنى ەرلەر اراسىندا 500, 5000 مەترگە كوپسايىس، ايەلدەر اراسىندا 500، 3000 مەترگە جۇگىرۋ، ەرلەر مەن ايەلدەر اراسىندا قىسقا قاشىقتىققا جۇگىرۋدەن جالپى سانى 6 سپورت ءتۇرى بويىنشا جارىس وتكەن.
ودان كەيىن ەرلەر اراسىنداعى 5000 مەترگە كوپسايىس جارىسىندا شىڭجاڭ قۇراماسىنىڭ سپورتشىسى قاناعات مۇحامەت ۇلى 6 مينۋت 28 سەكۋندقا سىرعاناپ، چەمپيون اتاندى. ول وزىنەن كەيىنگى ورىندى يەلەنگەن سپورتشىدان 2,367 سەكۋند العا وزعان. بۇل شىڭجاڭ كونكيمەن جۇگىرۋ كومانداسى ءۇشىن وسى تۋرنيردەگى العاشقى التىن مەدال بولدى.
ايتا كەتەيىك، قىتاي چەمپيوناتى 4 كۇنگە سوزىلىپ، ەل بويىنشا 22 پروۆينسيادان (اۆتونوميالىق وبلىستار مەن مۋنيتسيپاليتەتتەردەن) بارلىعى 166 سپورتشى، 20 كوماندا قاتىسىپ جاتىر. ايەلدەر كوپسايىسى – 500، 1500، 3000، 5000 مەتر جانە ەرلەر اراسىندا – 500، 1500، 5000، 10000 مەتر. سونداي-اق ەرلەر كومانداسى بارلىعى 22 جارىس ءتۇرى بويىنشا سايىسادى.
«بۇل جارىس - 2016 -جىلى وتكىزىلگەن 13-شى ۇلتتىق قىسقى ويىنداردان كەيىنگى شىڭجاڭدا ۇيىمداستىرىلعان قىسقى ءىس- شارالاردىڭ ىشىندەگى ەڭ جوعارى دەڭگەيدەگى جارىس»، - دەپ جازادى قىتايلىق People.com.
ايتا كەتەيىك، قاناعات مۇحامەت ۇلى (كونكيمەن جۇگىرۋ) ەسىمدى قانداسىمىز 1999 -جىلى التاي قالاسىندا تۋعان. 2013 -جىلى ول شىڭجاڭ ولكەلىك سپورت اكادەمياسىنا قابىلدانىپ، شورت- ترەكتەن جاتتىعۋدى باستادى. 2019 -جىلى كونكيمەن جۇگىرۋدەن ورتا جانە ۇزاق قاشىقتىققا ۇلتتىق قۇراما ساناتىنا ەنىپ، الەم چەمپيوناتىندا العاش رەت ءوز ەلىنىڭ اتىنان شىعىپ، ەرلەر اراسىنداعى كوماندالىق جارىستا 8-ورىندى جەڭىپ الدى. 2021 -جىلدىڭ قىركۇيەك ايىنان قازان ايىنا دەيىن شىڭجاڭدا وتكەن ەكى الەم چەمپيوناتىندا 4 رەت ءبىرىنشى ورىنعا قول جەتكىزىپ، ۇلتتىق رەكوردتى جاڭارتتى.
اۆتور
بەيسەن سۇلتان ۇلى