بيىل ساياسي قۋعىن-سۇرگىن قۇرباندارىن ەسكە الۋ كۇنى باسقاشا اتاپ وتىلەدى

استانا. قازاقپارات - پرەمەر-ءمينيستردىڭ ورىنباسارى التاي كولگىنوۆ ءماجىلىس دەپۋتاتتارىنىڭ ساۋالىنا بەرگەن جاۋابىندا اشتىق جانە ساياسي قۋعىن-سۇرگىن قۇرباندارىن ەسكە الۋ جۇمىستارى قالاي ۇيىمداستىرىلاتىنىن ايتقان، دەپ حابارلايدى قازاقپارات ءتىلشىسى.

«قازاقستان رەسپۋبليكاسىنداعى مەرەكەلىك كۇندەردىڭ تىزبەسىنە سايكەس 31-مامىر كۇنى - ساياسي قۋعىن سۇرگىن جانە اشارشىلىق قۇرباندارىن ەسكە الۋ كۇنى بولىپ بەلگىلەنگەن. وسى اتاۋلى كۇن اياسىندا رەسپۋبليكا بويىنشا ەسكە الۋ شارالارى مەن ەكسكۋرسيالار ۇيىمداستىرىلىپ، تەلەارنالاردا الاش قايراتكەرلەرىنىڭ مۇراسى دارىپتەلەدى. اقپاراتتىق جۇمىس اياسىندا مەملەكەتتىك تەلەارنالاردا تاقىرىپتىق سەريالدار مەن دەرەكتى فيلمدەر كورسەتىلەدى»، - دەپ جازادى ۆيتسە-پرەمەر.

بيىل 31-مامىردا تەلەارنالاردا كورسەتىلەتىن ونىمدەردىڭ ءتىزىمى جاسالىپ جاتقان كورىنەدى.

«ونىڭ ىشىندە «الاش» قوزعالىسىنا ارنالعان باعدارلامالار مەن دەرەكتى فيلمدەر ازىرلەنۋدە. بىلتىر مادەنيەت جانە سپورت مينيسترلىگى «ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ ماتەريالدارى» ارحيۆتىك جيناعىن باسىپ شىعاردى. سونىمەن قاتار الاش قايراتكەرلەرىنىڭ مۇراسىن جاستارىمىزعا جەتكىزۋ ماقساتىندا 2023 -جىلى جالپى ءبىلىم بەرۋ مەكتەپتەرىندە ارنايى سىنىپ ساعاتتارى وتكىزىلەتىن بولادى. وسىنداي شارالار جوعارى جانە ورتا ارناۋلى وقۋ ورىندارىندا جوسپارلانعان»، - دەلىنگەن جاۋاپتا.