مينيسترلىك جول قاۋىپسىزدىگىن مەكتەپتە جەكە ءپان رەتىندە وقىتۋدى ورىنسىز دەپ ەسەپتەيدى
قازاقپاراتتىڭ مينيستر اتىنا جولداعان ساۋالىنا كوميتەت باسشىسىنىڭ مىندەتىن اتقارۋشى زاۋرە بايمەنوۆانىڭ قولىمەن جولدانعان جاۋاپتا وسىنداي ۇستانىم ايتىلعان.
«جالپى ءبىلىم بەرۋ ۇيىمدارىندا جاڭا ءپاندى ەنگىزۋ ءبىلىم وبەكتىلەرىنە قويىلاتىن سانيتاريالىق- ەپيدەميولوگيالىق تالاپتارىندا بەكىتىلگەن اپتالىق وقۋ جۇكتەمەسىنىڭ كولەمىن ۇلعايتۋعا ىقپال ەتەتىنىن اتاپ وتكەن ءجون»، - دەلىنگەن جاۋاپتا.
ۆەدومستۆو دەرەگى بويىنشا، ەل مەكتەپتەرىندەگى وقۋشىلاردىڭ جۇكتەمەسى ونسىز دا دامىعان ەلدەر مەن ت م د مەملەكەتتەرىندەگى نورمادان ارتىق.
«قازىرگى ۋاقىتتاعى وقۋشىلاردىڭ اپتالىق جۇكتەمەسى ەكونوميكالىق ىنتىماقتاستىق پەن دامۋ، تاۋەلسىز مەملەكەتتەر دوستاستىعىنىڭ قۇرامىنا كىرەتىن مەملەكەتتەرمەن سالىستىرعاندا ساعات سانى جاعىنان اسىپ تۇسەدى. وسىعان بايلانىستى بۇگىندە ورتا ءبىلىم بەرۋ جۇيەسىندە ءبىلىم الۋشىنىڭ وقۋ جۇكتەمەسىن تومەندەتۋ بويىنشا شارالار قابىلدانىپ جاتىر. كەشەندى جۇمىستىڭ جۇرگىزىلۋىنە جانە ءبىلىم بەرۋدىڭ ءتيىستى دەڭگەيلەرىندەگى وقۋ پاندەرىنىڭ مازمۇنىندا قامتىلۋىنا بايلانىستى «جول قوزعالىسى ەرەجەلەرى» ءپانىن جەكە ءپان رەتىندە ەنگىزۋ ورىنسىز دەپ سانايمىز»، - دەپ جازىلعان كوميتەت مالىمەتىندە.
ەسكە سالساق، ىشكى ىستەر مينيسترلىگى اكىمشىلىك پوليتسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقتوتى بورانوۆا ءجۇرۋ ەرەجەسى ساباقتارىن مەكتەپ باعدارلامالارىندا جەكە مىندەتتى ءپان رەتىندە وتكىزۋ ماسەلەسى قاراستىرىلىپ جاتقانىن ەسكە سالعان ەدى.
«ىشكى ىستەر مينيسترلىگى وقۋ- اعارتۋ مينيسترلىگىنە جول ءجۇرۋ ەرەجەسى ساباعىن مەكتەپ باعدارلاماسىنا جەكە مىندەتتى ءپان رەتىندە وتكىزۋ تۋرالى ۇسىنىس جولدادى. ءبىزدىڭ ۇسىنىسىمىزدى ۇكىمەت قابىلدادى جانە مۇددەلى مەملەكەتتىك ورگاندارعا ءتيىستى تاپسىرمالار بەرىلدى»، - دەگەن بولاتىن اعا ينسپەكتور.
اۆتور
ەسىمجان ناقتىباي