سەناتتا جەردى ءتيىمدى پايدالانۋعا مۇمكىندىك بەرەتىن زاڭ قابىلداندى

استانا. قازاقپارات - بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جىلجىمايتىن مۇلىكتىڭ ءبىرىڭعاي مەملەكەتتىك كاداسترى شەڭبەرىندە مەملەكەتتىك كورسەتىلەتىن قىزمەتتەردى سيفرلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ەكىنشى وقىلىمدا قارالىپ، قابىلداندى، دەپ حابارلايدى قازاقپارات ءتىلشىسى.

زاڭ جوباسىن قابىلداۋ تۇرعىندار مەن بيزنەس-قۇرىلىمدارعا جەر قورى جانە جىلجىمايتىن مۇلىك وبەكتىلەرى تۋرالى اقپاراتتى جەڭىل الۋىن قامتاماسىز ەتۋگە، جەر قاتىناستارى ءارى قالا قۇرىلىسى سالاسىندا جەمقورلىق تاۋەكەلدەردى تومەندەتۋگە، سونداي-اق مەملەكەتتىك قىزمەت كورسەتۋلەر بويىنشا قوسارلانعان پروتسەستەردى الىپ تاستاۋعا مۇمكىندىك بەرەدى.

«زاڭ جوباسىن قابىلداۋ ناتيجەسىندە جەر ۋچاسكەسىنە قۇقىقتاردى رەسىمدەۋ جەڭىلدەيدى. وسى ورايدا قىزمەتتەردى ەلەكتروندى فورماتقا كوشىرۋ ارقىلى اۆتوماتتاندىرۋ، جەر ۋچاسكەسىنە سايكەستەندىرۋ سەكىلدى ءبىرقاتار قۇجاتتاردى الىپ تاستاۋ، جەر كوميسسياسىنىڭ جۇمىسىنا وزگەرىستەر ەنگىزۋ ارقىلى كەلىسىمدەر سانىن ازايتۋ، ءتۇرلى ينستانتسيالار بويىنشا قۇجاتتاردىڭ بارىسىنا ونلاين مونيتورينگ جۇرگىزۋ، قۇجاتتاردى قاراۋ جانە كەلىسۋ مەرزىمىن 1 جىلدان 30 كۇنگە دەيىن قىسقارتۋ قاراستىرىلىپ وتىر»، - دەدى سەناتور سۇلتان دۇيسەمبينوۆ.

ونىڭ ايتۋىنشا، بۇل قۇجاتقا بۇرىن بولماعان ۇعىمدار ەنگىزىلمەك. بۇل تۇرعىدا جاريا كاداسترلىق كارتا، رەسىمدەلگەن جەر ۋچاسكەلەرىن جانە ولارداعى جىلجىمايتىن مۇلىك وبەكتىلەرىن (عيماراتتاردى، قۇرىلىستاردى) ۆيزۋاليزاتسيالاۋ، سونداي-اق بوس جەر ۋچاسكەلەرىن كورسەتۋ قۇرالى ەسكەرىلگەن. بۇدان بولەك، جەر جانە قۇقىقتىق كاداسترلاردى جۇرگىزۋدى قامتيتىن اقپاراتتىق جۇيەلەردى بىرىكتىرۋ جولىمەن «جىلجىمايتىن مۇلىكتىڭ ءبىرىڭعاي مەملەكەتتىك كاداسترى» اقپاراتتىق جۇيەسى، ياعني جەر ۋچاسكەلەرىنىڭ كاداسترلىق ەسەبىن جەتىلدىرۋگە باعىتتالعان ءبىرىڭعاي اقپاراتتىق جۇيە قامتىلادى.

«سەناتتىڭ دەپۋتاتتارىنىڭ ەسكەرتۋلەرى مەن ۇسىنىستارىن ەسكەرە وتىرىپ، زاڭ جوباسىن تالقىلاۋ بارىسىندا قۇجاتقا ءتيىستى نەگىزگى باعىتتار بويىنشا وزگەرىستەر مەن تولىقتىرۋلار ەنگىزىلدى. زاڭ جوباسىنىڭ اتاۋىنا، سونداي-اق جاڭا ۇعىمدار جانە كەيبىر ۇعىمداردىڭ اتاۋلارىنا وزگەرىستەر ەنگىزىلدى»، - دەدى س. دۇيسەمبينوۆ.

ءوز كەزەگىندە سەنات ءتوراعاسى ماۋلەن اشىمبايەۆ وسى زاڭ ارقىلى جەر ۋچاسكەسىنە قۇقىقتى ەلەكتروندى تۇردە بەرۋ ءتارتىبى ايقىندالاتىنىن ايتتى.

«جەردى بارىنشا ءتيىمدى پايدالانۋعا جاعداي جاساۋ - مەملەكەتتىڭ الدىندا تۇرعان ماڭىزدى مىندەتتەردىڭ ءبىرى. بۇل رەتتە، جەر سالاسىن تسيارلاندىرۋدىڭ بەرەرى مول ەكەنى ءسوزسىز. سوندىقتان قابىلدانعان زاڭ وسى باعىتتا جاسالعان ناقتى قادام. وسى زاڭ ارقىلى جەر ۋچاسكەسىنە قۇقىقتى ەلەكتروندى تۇردە بەرۋ ءتارتىبى ايقىندالادى جانە جالپى وسى سالاداعى مەملەكەتتىك ساياساتتىڭ اشىق بولۋى قامتاماسىز ەتىلەدى. زاڭ جوباسىن قاراۋ باراسىندا سەنات وعان قوسىمشا تۇزەتۋلەر ەنگىزدى. الداعى ۋاقىتتا زاڭ جەر قاتىناستارى سالاسىنداعى مەملەكەتتىك قىزمەتتەردى وڭتايلاندىرۋعا جانە ولاردىڭ تيىمدىلىگىن ارتتىرۋعا وڭ اسەرىن تيگىزەدى دەپ سەنەمىز»، - دەدى سەنات ءتوراعاسى.