دانا نۇرجىگىت بەيسەن قۇرانبەكپەن سوڭعى كەزدەسۋى تۋرالى ايتتى

استانا. قازاقپارات - جۋرناليست، تەلەجۇرگىزۋشى دانا نۇرجىگىت تانىمال جۋرناليست بەيسەن قۇرانبەك تۋرالى ەستەلىگىن ءبولىستى.

دانا نۇرجىگىت مارقۇم بەيسەن قۇرانبەكتى سوڭعى رەت قاشان كورگەنىن ايتتى.

«9-اقپاندا بەيسەن حابارلاسقان. داۋسى السىرەگەن، وكسىك قىسىپ، ىزاعا بۋلىعىپ سويلەپ تۇر.«دانا، مەنى ونكولوگيالىق اۋرۋحاناعا جاتقىزباي جاتىر. نەگە؟ مەنىڭ وسىدان بۇرىن جاتقان پالاتاما جىبەرمەي جاتىر. نەگە؟ مەن دە قازاقتىڭ ءبىر كەرەگىنە جارايمىن عوي»، - دەدى. مەن بۇرىن سوڭدى مۇنداي بەيسەندى ەستىگەن جوقپىن، كورگەن جوقپىن، بىلمەيمىن. وسىنشاما شاراسىز جاعدايعا تۇسكەن بەيسەن «قازاقتىڭ كەرەگىنە ءالى جارايمىن عوي!» دەپ تۇرعان بەيسەن، مەنىڭ جۇرەگىم قارس ايىرىلدى. كەيىن كەلىنشەگى گۇلميرا حابارلاستى.

«دانا، مۇمكىندىك بولسا كەلىپ كەتسەڭىز» دەدى. جانىم الاسۇرىپ بىردەن اۋەجاي كاسساسىنا حابارلاسىپ، الماتىعا بيلەت الدىم»، - دەيدى دانا نۇرجىگىت.

جۋرناليست بيلەت ساتىپ العانىمەن ارعى كۇنى پلەنارلىق وتىرىسقا قاتىسۋى ءتيىس بولعان ەكەن.

«مەن پارلامەنتتە جۇمىس ىستەيمىن. سودان باستىققا بارىپ سۇرانىپ ەدىم، رۇقسات بەرمەدى.«ەت جاقىن تۋىسقاندارىڭىز بولسا ماقۇل، ءبىراق بۇل ارىپتەسىڭىز عوي» دەگەن جاۋاپ الدىم. نە دە بولسا جولعا شىقتىم. الماتىعا جەتكەندە عانا گۇلميراعا حابارلاستىم.

«گۇلميرا، مەن اۋەجايدا تۇرمىن» دەدىم. «قاي اۋەجايدا، استاناداسىز با؟ الماتىداسىز با؟» دەدى. جوق، مەن الماتىدا تۇرمىن دەدىم. گۇلميرا كولىك جىبەرىپ، بەيسەننىڭ ۇيىنە كەلدىم. بەيسەن قالا سىرتىنا قاراي ورنالاسقان ەكىقاباتتى ۇلكەن ءۇيدىڭ ەكىنشى قاباتىندا جالعىز ءوزى توسەك تارتىپ جاتىر. ارينە، قاتتى جۇدەگەن. ءبىراق كوزى بۇرىنعى بەيسەننىڭ كوزى. مەنى كورىپ قۋانىپ كەتتى. ەكەۋىمىز قۇشاقتاسىپ امانداستىق. ارقامنان قاعىپ،«ازاماتسىڭ، دانا، ازاماتسىڭ» دەدى. ەكەۋىمىز ءبىراز اڭگىمەلەستىك»، - دەيدى جۋرناليست.

وسىلايشا ءبىراز اڭگىمەلەسكەننەن كەيىن دانا نۇرجىگىت اۋەجايعا قايتادان كەلگەن.

«بەيسەن تەرەڭ كۇرسىنىپ، موينىن تەرەزەگە قاراي بۇردى.«شارشادىڭ با، بەيسەن؟» دەدىم. «ءيا، شارشادىم، السىرەپ قالدىم، دانا» دەدى. ولاي بولسا مەن جۇرەيىن، سەنى كورىپ كەتەيىن دەپ ەدىم، سەنىڭ كەشەگى داۋسىڭ ۇنامادى ماعان، ءوزىڭدى قولعا ال، ءبارى جاقسى بولادى دەدىم. سول كۇنى كەشكە اۋەجايعا قايتىپ ورالدىم. اۋەجايعا قايتادان كەلگەن كەزدە جاعداي مۇلدە باسقاشا بولدى. مەن ويلاعانداي ەمەس، قولىمداعى بيلەت تۇككە جارامادى. رەيس كەشىگەتىن بولدى. سودان بۇكىل جولاۋشى اشۋ-ىزاسىن ءبىلدىرىپ، بۇكىل كومپانيانىڭ وكىلدەرى وسىندا كەلسىن دەپ تالاپ قويدى. اۋەجايداعى بلوگەرلەر دە تەلەفونىن قولعا الىپ، الگى شۋدى تۇسىرە باستادى. رەيس مۇلدە ۇشپايتىن بولدى. رەيس كەلەسى كۇنى تاڭعى 4 كە قويىلدى. ەرتەڭ جۇمىستان قالسام نە ىستەيمىن؟ پلەنارلىق وتىرىس ەمەس پە. رەيس تاڭعى تورتتە ارەڭ ۇشتى. استاناعا جەتە سالا كومەكشىمە حابارلاسىپ، كابينەتتە ءبارىن داينىداپ قوي، پلەنارلىق وتىرىسقا باراتىن پاپكام، ءبارى دايىن تۇرسىن دەدىم. جينالىستىڭ باسىنا ارەڭ ۇلگەردىم. سول كۇنى مەنىڭ الدىمدا تاڭداۋ تۇردى: دوسىمنىڭ الدىنداعى سوڭعى پارىزدى ورىنداۋ كەرەك پە، الدە مەملەكەتتىك قىزمەتتەگى مىندەتتى ورىنداۋ. مەن ءبىرىنشىسىن تاڭدادىم. دوسىمدى سوڭعى رەت كورىپ قالدىم. سوڭعى ءسوزىن ەستىدىم. ناۋقاستىڭ ءحالىن سۇراپ بارىپ، دوسىمنىڭ الدىنداعى پارىزىمدى ورىندادىم»، - دەيدى دانا نۇرجىگىت.

ەسكە سالايىق، تانىمال تەلەجۇرگىزۋشى، قازىردە «جەتىسۋ» تەلەارناسىنىڭ ديرەكتورى بەيسەن قۇرانبەك 2020 -جىلدىڭ 18-مامىرىندا قايتىس بولدى. 2019 -جىلدىڭ جەلتوقسانىندا الەۋمەتتىك جەلىلەر مەن مەسسەندجەرلەردە بەيسەن قۇرانبەك اۋىر دەرتكە شالدىقتى دەگەن حابار تاراعان ەدى.

2019 -جىلى اقپاندا تەلەجۇرگىزۋشى اسقازان جاراسى شىعىپ، دارىگەرلەردىڭ ونى ەكىنشى رەت امان الىپ قالعانىن Instagram جەلىسىندە جازعان بولاتىن.

بەيسەن قۇرانبەك 1971 -جىلدىڭ 9-جەلتوقسانىندا الماتى وبلىسىنىڭ قىزىلجار اۋىلىندا دۇنيەگە كەلگەن. ۇزاق جىلدار بويى ەلىمىزدەگى ءبىرقاتار رەسپۋبليكالىق تەلەارنادا قىزمەت اتقارعان. 2013-2017 -جىلدارى Qazaqstan ۇلتتىق تەلەارناسىنداعى كوپشىلىككە تانىمال «ايتۋعا وڭاي» الەۋمەتتىك- تۇرمىستىق توك-شوۋىنىڭ جۇرگىزۋشىسى بولدى. 2017 -جىلدىڭ قىركۇيەك ايىنان ۇلتتىق ارناداعى «قارەكەت» باعدارلاماسىنىڭ تىزگىنىن ۇستاعان ەدى. 2014 -جىلدان باستاپ الماتى وبلىستىق «جەتىسۋ» تەلەارناسىنىڭ باس ديرەكتورى قىزمەتىن اتقارىپ كەلدى.

Massaget.kz