كاسىپكەرلەر باعانى تۇراقتاندىرۋ قورىنان ازىق-تۇلىكتى قىمباتقا ساتىپ الۋعا ءماجبۇر بولعان

پەتروپاۆل. قازاقپارات - سولتۇستىك قازاقستان وبلىسى سىبايلاس جەمقورلىققا قارسى قىزمەتكە جەكە كاسىپكەر ارىزدانىپ، تۇراقتاندىرۋ قورىنداعى ازىق-تۇلىكتى قىمبات باعاعا الۋعا ءماجبۇر بولعانىن ايتتى، دەپ حابارلايدى قازاقپارات ءتىلشىسى.

س ق و سىبايلاس جەمقورلىققا قارسى قىزمەتتىڭ مالىمەتىنشە، شاعىمدانۋشى «سولتۇستىك» الەۋمەتتىك-كاسىپكەرلىك كورپوراتسياسى» ا ق تاراپىنان اكىمشىلىك كەدەرگىنىڭ جاسالعانىن حابارلاعان.

كاسىپكەردىڭ ايتۋىنشا، ول اۋىلدىق جەردە دۇكەن ۇستايدى. ساتۋ ءۇشىن تۇراقتاندىرۋ قورىنان الەۋمەتتىك ماڭىزى بار ازىق-تۇلىكتىڭ 5 ءتۇرىن الماق بولادى. الايدا اكسيونەرلىك قوعامدا ونى الەۋمەتتىك قانتتى قوسىمشا الۋعا مىندەتتەگەن. بۇل تاۋار ول جەردە باسقا كوتەرمە باعامەن ساتۋشىلاردان 30 تەڭگەگە قىمبات بولعان.

«سولتۇستىك» ا ك ك» ا ق وسىلايشا شاعىن بيزنەس سۋبەكتىلەرى ەسەبىنەن بۇرىن قىمبات باعاعا الىنعان ازىق- تۇلىكتەن قۇتىلماق بولعان.

ۆەدومستۆونىڭ ارالاسۋىنان كەيىن بارلىق تاراپتاردىڭ قاتىسۋىمەن كەزدەسۋ ءوتىپ، ماسەلە وڭ شەشىلدى. ياعني، كاسىپكەرلەر قاجەتتى ازىق- تۇلىكتى ەش شەكتەۋسىز ساتىپ الا الادى»، - دەلىنگەن حابارلامادا.

بۇعان دەيىن س ق و سىبايلاس جەمقورلىققا قارسى قىزمەت بىرنەشە رەت پارا العان مەملەكەتتىك اۋديتوردىڭ 7 جىلعا باس بوستاندىعىنان ايىرىلعانىن جاريالاعان بولاتىن. تەكسەرۋ كوميسسياسىنىڭ مۇشەسى انىقتالعان ولقىلىقتارعا كوز جۇمعانى ءۇشىن 300 ليتر بەنزين العان.