جابىرلەنۋشى سوتتا بيزنەسىن گۇلميرا ساتىبالدى قالاي تارتىپ العانىن ايتتى

استانا. قازاقپارات - ەلوردادا وتكەن گۇلميرا ساتىبالدىنىڭ سوتىنا كاسىپكەر تۇرسىنعالي الاگوزوۆ جابىرلەنۋشى رەتىندە قاتىسىپ، ايىپتالۋشىنىڭ بيزنەستى بەرۋىن تالاپ ەتكەنىن ايتتى، دەپ حابارلايدى قازاقپارات ءتىلشىسى.

2016-جىلى تۇرسىنعالي الاگوزوۆ بۇرىنعى ايەلى لايسيرا ماراتپەن اجىراستى. ول تاپقان مۇلكىن ايەلى مەن بالالارىنا ءوز ەركىمەن قالدىردى. الايدا بۇرىنعى ايەلى تۇرسىنعالي الاگوزوۆكە تيەسىلى Galanz Bottlers كومپانياسىنىڭ اكسيالارىن ءبولۋدى تالاپ ەتتى.

«جۇبايىم اكسيانى ءبولۋدى تالاپ ەتىپ، مەن ديرەكتورلار كەڭەسىنىڭ ءتوراعاسى لاۋازىمىندا ياعني بيزنەس باسشىسى بولىپ قالا بەرەتىندىگىمدى ايتىپ سەندىردى. مەن وعان سەنىپ، كومپانيانىڭ %43,25 اكسياسىن سىيعا تارتتىم. ول ماماندىعى بويىنشا زاڭگەر. بۇرىنعى ايەلىم مەنى قۇرىعىنا ءتۇسىرىپ قالعان اكسيالاردى يەمدەنۋگە تىرىسىپ، سوتقا جۇگىنە باستادى»، - دەدى تۇرسىنعالي الاگوزوۆ سوت بارىسىندا.

ونىڭ ايتۋىنشا، تانىسى بەردىقۇلوۆ ارقىلى ريفشانوۆتىڭ زاڭ كومپانياسىنا جۇگىنۋگە ءماجبۇر بولعان. ويتكەنى ت. الاگوزوۆكە «Galanz Bottlers» ديرەكتورلار كەڭەسىنىڭ ءتوراعاسى لاۋازىمىن قالپىنا كەلتىرۋىنە زاڭ كومەگى قاجەت بولدى.

«1,5 جىلعا سوزىلعان رەيدەرلىك فاكتىسى بويىنشا قىلمىستىق ءىس قوزعالدى. ريفشانوۆتىڭ زاڭگەرلەرى مۇلىكتى ءبولۋ قاۋپىن بولدىرماۋ ءۇشىن قالعان اكسيالاردى (%43,25) مەنىڭ سەنىمدى ادامدارىمنىڭ اتىنا قايتا جازۋدى ۇسىندى. مەن بەردىقۇلوۆتىڭ اتىنا %3 جانە ريفشانوۆتىڭ اتىنا %40,25 اكسيانى جالعان تىركەدىم. ولار مەنىڭ اكسيالارىمنىڭ نومينالدى يەلەرى بولدى»، - دەپ ءتۇسىندىردى جابىرلەنۋشى.

الايدا، تۇرسىنعالي الاگوزوۆ اكسيالاردىڭ ناقتى يەسى بولىپ قالا بەردى.

«2018-جىلدىڭ كۇزىندە ماعان بەردىقۇلوۆ حابارلاسىپ، وعان قايرات ساتىبالدى قوڭىراۋ شالىپ، ريفشانوۆ ەكەۋىنەن اكسيالاردى گۇلميرا ساتىبالدىعا بەرۋدى تالاپ ەتكەنىن ايتتى. گۇلميرا ساتىبالدى ولاردى، ياعني ريفشانوۆ پەن بەردىقۇلوۆتى كەزدەسۋگە شاقىرعان. بەردىقۇلوۆتىڭ ايتۋىنشا، كەزدەسۋدە ساتىبالدى ازاماتتىق جانە قىلمىستىق ىستەردى توقتاتىپ، اكسيالاردى تاپسىرۋدى تالاپ ەتكەن. ال بەردىقۇلوۆ پەن رافشانوۆ قورقىپ، ابدىراپ قالعان. مەن بۇل ادامدارعا قارسى تۇرا المايتىنىمدى ءتۇسىندىم»، - دەپ ءتۇسىندىردى ت. الاگوزوۆ.

كەيىن تۇرسىنعالي الاگوزوۆ گۇلميرا ساتىبالدىمەن كەزدەسكەن.

«گۇلميرا ساتىبالدىمەن سويلەسىپ، بۇل مەنىڭ بۇرىنعى ايەلىمە قاتىستى وتباسىلىق ءىس ەكەنىن ايتتىم. سونىمەن قاتار ماسەلەنى ءوزىم شەشەتىندىگىمدى ايتا كەلە، ىسكە ارالاسپاۋىن سۇرادىم. مەن وعان بىرنەشە رەت ايتتىم، ءبىراق تىڭداعىسى كەلمەدى. سوڭىندا ماعان كەلىسۋگە تۋرا كەلدى، ويتكەنى، مەملەكەتتىڭ العى ادامدارىمەن كۇرەسە المايتىنىمدى ءتۇسىندىم، ودان پايدا جوق. مەن ريفشانوۆ پەن بەردىقۇلوۆقا اكسيالاردى قايتا جازۋعا كەلىسىم بەردىم. اكسيالاردى بەرۋ الۋ-ساتۋ شارتىن رەسىمدەۋ ارقىلى جۇزەگە اسىرىلدى. وندا ءبىر اكسيانىڭ قۇنى 1 تەڭگەمەن بەلگىلەندى، ال نارىقتا ءبىر اكسيا شامامەن 200 تەڭگەنى قۇرادى، ياعني 200 ەسە ايىرماشىلىق بولدى»، - دەيدى جابىرلەنۋشى ت. الاگوزوۆ سوت بارىسىندا.

ەسكە سالايىق، گ. ساتىبالدى كاسىپورىنداردىڭ قاتىسۋ ۇلەسىن زاڭسىز يەمدەنۋ، سونىڭ ىشىندە ادام ۇرلاۋمەن ۇشتاسقان ەكى فاكتى بويىنشا تەرگەلگەن ەدى. جابىرلەنۋشىگە كەلگەن زالال سوماسى - 6,6 ميلليارد تەڭگەدەن اسادى.

بۇعان دەيىن بەلگىلى بولعانداي، انتيكور گۇلميرا ساتىبالدى ادام ۇرلاۋ فاكتىسى بويىنشا تەرگەلىپ جاتقانى تۋرالى حابارلادى.

وتكەن جىلى 18- ناۋرىزدا ەلوردا سوتى گۇلميرا ساتىبالدىنى 2 اي مەرزىمگە قاماۋعا الۋعا سانكسيا بەرگەن ەدى.

گۇلميرا ساتىبالدى قايرات ساتىبالدىنىڭ بۇرىنعى ايەلى.