مەملەكەت باسشىسى قونايەۆ قالاسىن دامىتۋ جۇمىستارىن جالعاستىرۋدى جۇكتەدى

استانا. قازاقپارات - مەملەكەت باسشىسى الماتى وبلىسىنىڭ اكىمى مارات سۇلتانعازيەۆتى قابىلدادى، دەپ حابارلايدى قازاقپارات اقورداعا سىلتەمە جاساپ.

پرەزيدەنتكە ءوڭىر ەكونوميكاسىنىڭ ءوسىمىن قامتاماسىز ەتۋ، حالىقتىڭ تۇرمىس ساپاسى مەن تابىسىن ارتتىرۋ، سونداي-اق جاڭا وبلىس ورتالىعىن دامىتۋ جونىندەگى تاپسىرمالارىنىڭ ورىندالۋ بارىسى تۋرالى ەسەپ بەرىلدى.

مارات سۇلتانعازيەۆتىڭ ايتۋىنشا، بىلتىر وبلىستا الەۋمەتتىك-ەكونوميكالىق دامۋدىڭ بارلىق نەگىزگى سالاسى بويىنشا تۇراقتى ءوسىم كورسەتكىشى ساقتالعان. 37,2 مىڭ جۇمىس ورنى اشىلعان. ونىڭ 26,3 مىڭى - تۇراقتى جۇمىس.

مەملەكەت باسشىسىنا وڭىردە سۋ تاسقىنىنا قارسى ءىس-شارالاردى ىسكە اسىرۋ، تۇرعىندار مەن شارۋاشىلىق نىساندارىنىڭ قاۋىپسىزدىگىن قامتاماسىز ەتۋ جانە تابيعي اپاتتار سالدارىنان بولاتىن زالالدى مۇمكىندىگىنشە ازايتۋ جونىندە مالىمەت بەرىلدى.

پرەزيدەنتكە وبلىس ورتالىعىن دامىتۋدىڭ 2030-جىلعا دەيىنگى كەشەندى دامۋ جوسپارىنىڭ ازىرلەنۋ بارىسى تۋرالى باياندالدى.

اكىم كوكتەمگى ەگىن ەگۋ جۇمىستارىنا، ساياجاي الاپتارى جونىندەگى تۇيتكىلدەردىڭ شەشىلۋىنە، ينجەنەرلىك ينفراقۇرىلىمنىڭ رەكونسترۋكتسياسىنا جانە اۋىل شارۋاشىلىعى ماقساتىنداعى يگەرىلمەي جاتقان جەرلەردى مەملەكەتكە قايتارۋعا قاتىستى ماسەلەلەر تۋرالى ايتتى.

قاسىم-جومارت توقايەۆ وبلىس اكىمىنە ورتالىق مەملەكەتتىك ورگاندارمەن بىرلەسىپ، قونايەۆ قالاسىن دامىتۋ جوسپارىن پىسىقتاۋ جونىندەگى جۇيەلى جۇمىستاردى جالعاستىرۋدى، سونداي-اق وبلىس اۋماعىن كەشەندى دامىتۋ مىندەتتەرىن جۇزەگە اسىرۋدى تاپسىردى.