پرەمەر- مينيستر ناشاقورلاردى ەمدەۋ ادىستەمەسىن جاڭارتۋدى تاپسىردى
«ناشاقورلاردى ەمدەۋ، وڭالتۋ جانە الەۋمەتتىك ورتاعا بەيىمدەۋ ادىستەمەلەرىن جەتىلدىرۋ قاجەت. وسى باعىتتاعى حالىقارالىق تاجىريبەنى ەسكەرە وتىرىپ، قولدانىستاعى ەمدەۋ ادىستەرىنىڭ تيىمدىلىگىنە تالداۋ جۇرگىزىپ، جاڭا تاسىلدەردى ازىرلەۋ كەرەك.
ناشاقورلىقتان ايىققان ادامدارعا قوعامنىڭ دۇرىس كوزقاراسىن قالىپتاستىرعان ءجون. بۇل جەردە ەمدەلۋگە ىنتالاندىرۋ عانا ەمەس، ونداي ادامداردى ودان ءارى الەۋمەتتەندىرۋ قاجەت. سوندىقتان دەنساۋلىق ساقتاۋ جانە ەڭبەك مينيسترلىكتەرى وسى باعىتتاعى كۇش- جىگەرىن بىرىكتىرىپ، ءتيىستى شارالاردى ۇسىنسىن»، - دەدى ول ۇكىمەت وتىرىسىندا.
ال ادىلەت مينيسترلىگىنە سوت- ساراپتاما ورگاندارىن زاماناۋي قۇرالدارمەن قامتاماسىز ەتۋ جۇكتەلدى.
«سوت- ساراپتاما ورگاندارىنىڭ ماتەريالدىق تەحنيكا مەن جابدىقتارى، ەسىرتكى زەرتتەۋ ادىستەمەسى زامان تالابىنان ارتتا قالىپ وتىر. ادىلەت مينيسترلىگىنە سوت- ساراپتاما ورگاندارىن ماتەريالدىق- تەحنيكالىق قامتاماسىز ەتۋ جونىندە ءتيىستى شارالاردى تۇراقتى تۇردە قابىلداۋ قاجەت»، - دەدى ءاليحان سمايىلوۆ.