قازاقستاندىقتار ەندى ءۇي ساتىپ الۋ نەمەسە جالداۋ كەزىندە اۋدانداعى قىلمىس دەڭگەيىن بىلە الادى
ەندى قازاقستاندىقتار ءۇي ساتىپ الۋ نەمەسە جالداۋ كەزىندە اۋدانداعى قىلمىس دەڭگەيىن بىلە الادى، دەپ حابارلايدى قازاقپارات ءتىلشىسى.
كارتانى ق ر باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ كوميتەتى ازىرلەگەن. «قىلمىستىق قۇقىق بۇزۋشىلىق كارتاسىندا» زاڭعا قايشى ارەكەتتىڭ قاي باپ بويىنشا، قاشان جانە قانداي جاعدايدا جاسالعانىن بىلۋگە بولادى. قازىردىڭ وزىندە بۇل ەلەكتروندىق كارتا ەلىمىزدىڭ ءىرى قالالارىنان باستاپ، شاعىن ەلدى مەكەندەرىنە دەيىن ەنگىزىلدى.
«پوليتسيا قىزمەتكەرلەرى سوتقا دەيىنگى تەرگەپ- تەكسەرۋدىڭ ءبىرىڭعاي ءتىزىلىمى اقپاراتتىق جۇيەسىنە قۇقىق بۇزۋشىلىق جاسالعان جەر تۋرالى قاجەتتى مالىمەتتەردى تولتىرعاننان كەيىن ول اۆتوماتتى تۇردە كارتادا كورسەتىلەدى. جۇيە ونلاين رەجيمدە جۇمىس ىستەيدى. قىلمىستار بويىنشا دەرەكتەر اۆتوماتتى تۇردە جاڭارتىلىپ وتىرادى»، - دەدى قۇقىقتىق ستاتيستيكا جانە ارنايى ەسەپكە الۋ كوميتەتىنىڭ اقپاراتتىق- تالداۋ جۇمىسى، سيفرلاندىرۋ جانە اقپاراتتىق رەسۋرستاردى قورعاۋ باسقارماسىنىڭ باسشىسى ديدار بۇلتانوۆ.
سونداي- اق، كارتادا ۋچاسكەلىك پوليتسيا پۋنكتتەرى كورسەتىلگەن. سول سياقتى كامەلەتكە تولماعاندارعا قاتىستى جىنىستىق سيپاتتاعى قىلمىس جاساعان ادامداردىڭ، جول- كولىك اپاتتارىنىڭ جانە كاسىپكەرلەرگە جۇرگىزىلگەن تەكسەرىستەردىڭ ناتيجەلەرى كارتادا كورسەتىلەدى. قۇراستىرۋشىلار بۇل ءونىمدى جەتىلدىرە ءتۇسۋدى جوسپارلاپ وتىر.