ەلجان ءبىرتانوۆ «قازمەد» مەدقىزمەتكەرلەر كاسىپوداعى ءتوراعاسىنىڭ كەڭەسشىسى بولىپ تاعايىندالدى

استانا. قازاقپارات - بۇرىنعى دەنساۋلىق ساقتاۋ ءمينيسترى ەلجان ءبىرتانوۆ QazMed رەسپۋبليكالىق سالالىق مەديتسينا قىزمەتكەرلەرى كاسىپوداعى ءتوراعاسىنىڭ كەڭەسشىسى بولىپ تاعايىندالدى، دەپ حابارلايدى قازاقپارات.

ەكس-ءمينيستردىڭ جاڭا قىزمەتكە تاعايىندالعانى تۋرالى ق ر كاسىپوداقتار فەدەراتسياسى مەديا ورتالىعىنىڭ ديرەكتورى گۇلميرا قاراكوزوۆا مالىمدەدى.

«Qazmed» مەديتسينا قىزمەتكەرلەرىنىڭ رەسپۋبليكالىق سالالىق كاسىپتىك وداعىنىڭ قاتارى ارتۋدا. بۇگىن ۇجىمعا ق ر كاسىپوداقتار فەدەراتسياسىنىڭ كەڭسەسىندە كاسىپوداق ءتوراعاسىنىڭ جاڭا كەڭەسشىسى ەلجان ءبىرتانوۆ تانىستىرىلدى. «Qazmed» رەسپۋبليكالىق مەديتسينا قىزمەتكەرلەرى كاسىپوداعىنىڭ ءتوراعاسى ءالياقپار ماتىشەۆ ارىپتەستەرىن قۇتتىقتاي وتىرىپ، مەديتسينا قىزمەتكەرلەرى الەۋمەتتىك-ارىپتەستىك قاتىناستاردى دامىتۋدا وراسان زور تاجىريبەسى بار ەلجان ءبىرتانوۆقا ۇلكەن ءۇمىت ارتىپ وتىرعانىن اتاپ ءوتتى»، - دەپ جازدى گۇلميرا قاراكوزوۆا Facebook پاراقشاسىندا.

ءوز كەزەگىندە ەلجان ءبىرتانوۆ مەديتسينا جۇرتشىلىعىنىڭ مۇددەسىن ىلگەرىلەتۋ ءۇشىن بار تاجىريبەسى مەن ءبىلىمىن قولداناتىنىن جەتكىزدى.

«كاسىپوداقتىڭ ءرولى مەديتسينا قىزمەتكەرلەرىن الەۋمەتتىك تۇرعىدان قورعاۋدا ماڭىزدى. دەنساۋلىق ساقتاۋ سالاسىندا الەۋمەتتىك ارىپتەستەرمەن بىرلەسىپ ءبىز شەشەتىن ماسەلەلەر ءالى دە بار. اتاپ ايتقاندا، مەديتسينا قىزمەتكەرلەرىنىڭ مارتەبەسى، مەكەمەلەردى كادرلارمەن قامتاماسىز ەتۋ، جاس مامانداردى جۇمىسقا ورنالاستىرۋ، الەۋمەتتىك قولداۋدى زاڭنامالىق تۇردە ايقىنداۋ. مەملەكەت باسشىسى قاسىم- جومارت توقايەۆتىڭ مەديتسينا قىزمەتكەرلەرىنە لايىقتى ەڭبەكاقى تولەۋدى قامتاماسىز ەتۋ جونىندەگى تاپسىرماسىن ىسكە اسىرۋدى جالعاستىرۋىمىز كەرەك. سالالىق كەلىسىمگە ءتيىستى وزگەرىستەر ەنگىزۋ قاجەت»، - دەيدى بۇرىنعى مينيستر.

ەسكە سالايىق، ەلجان ءبىرتانوۆ 2020 -جىلدىڭ 3-قاراشاسىندا بيۋدجەت قاراجاتىن ىسىراپ ەتتى دەگەن كۇدىكپەن قاماۋعا الىنعان بولاتىن.

اتاپ ايتقاندا، ەلجان ءبىرتانوۆ پەن ونىڭ بۇرىنعى ورىنباسارى ولجاس ابىشەۆ «لاۋازىمدىق وكىلەتىن تەرىس پايدالانۋ» ارقىلى مەملەكەتكە 1,5 ميلليارد تەڭگە شىعىن كەلتىردى دەپ ايىپتالدى.

2022 -جىلى 28-قازاندا استانا قالاسى سارىارقا اۋدانىنىڭ №2-سوتى بۇرىنعى دەنساۋلىق ساقتاۋ ءمينيسترى ەلجان ءبىرتانوۆ پەن ونىڭ ورىنباسارى ولجاس ابىشەۆتىڭ ىسىنە قاتىستى ۇكىم شىعاردى.

ەكس-مينيستر سوت شەشىمىمەن كەلىسپەيتىنىن ايتىپ، شاعىم تۇسىرەتىنىن مالىمدەگەن بولاتىن.