مادەني كود! ءارتۇرلى ەلدەگى وزگەشە ادەتتەر

استانا. قازاقپارات - ءاربىر ەلدىڭ وزىندىك قايتالانباس مادەني كودى بار، بۇل ونىڭ باستى بايلىعى دەسە دە بولادى.

ولاردىڭ كەيبىرى ستەرەوتيپ رەتىندە كورىنۋى مۇمكىن، ءبىراق ەشبىر ستەرەوتيپتىڭ ءوزى بوستان بوس تۋمايدى. تۋريزم تۋرالى جازاتىن Turistas باسىلىمى وسىنداي وزگەشىلىگى بار بەس ەلدى مىسالعا كەلتىرىپتى، دەپ حابارلايدى Tengritravel.kz.

ا ق ش

امەريكانىڭ كوپ بولىگىندە ۇيگە كىرگەندە اياق كيىمدى شەشپەيدى. بۇل قالا كوشەلەرىنىڭ تازالىعىنا بايلانىستى، ولاردى كۇندە جۋىپ تۇرادى ەكەن.

سوسىن بۇل ەلدە ادامنىڭ نە كيىپ العانىنا مۇلدە نازار اۋدارمايدى، ءسىز دۇكەنگە پيجامامەن بارىپ كەلسەڭىز دە سىزگە ەشكىم تەسىرەيە قارامايدى.

ودان كەيىن بۇل ەلدە ۇيقىعا ەرتە جاتادى ەكەن، ماسەلەن كەشكى سەگىزدە. ال تاڭعىسىن ەرتە تۇرىپ، ەلدىڭ كوپ بولىگىندە كۇن شۋاقتى بولعاندىقتان سپورتپەن اينالىسۋ كەڭ تارالعان.

ۇلى بريتانيا

ۇلىبريتانيادا شايدى وتە جاقسى كورەدى. بۇل ادەت اعىلشىندارعا پورتۋگاليادان كەلگەن ەكەن. شايدى انگلياعا كاتارينا براگانسسكايا كورول ەكىنشى كارلعا تۇرمىسقا شىققاندا الىپ كەلگەن. سوسىن بۇل ادەت كەڭ تارالىپ، شاي سول كەزدە اعىلشىندار جاقسى كورگەن كوفەدەن دە سۇيىكتى بولىپ كەتىپتى.

گەرمانيا

نەمىستەر ءبارىن ەرەجە بويىنشا ىستەيتىن حالىق. بۇل ءتىپتى كۇندەلىكتى شايدى قايناتۋعا دا قاتىستى.

ودان كەيىن نەمىستەر جاڭا سىعىلعان شىرىندى سول كۇيدە ىشپەيدى، بۇل ەلدە ونى زياندى دەپ ەسەپتەيدى ەكەن. نەمىستەر وعان سۋ قوسىپ، كەيدە ۇستىنە مۇز دا سالىپ جاتادى.

فرانسيا

فرانتسيادا جۇمىس كۇنى كەزىندە تاماقتانۋعا ۇزاق ءۇزىلىس جاساۋ ادەتكە اينالعان - ەكى ساعاتقا دەيىن بارادى. ءاربىر جۇمىس بەرۋشى قىزمەتكەرىنىڭ استى بارىنشا لاززاتپەن قابىلداۋىنا جانە ازداپ دەمالۋىنا ءمان بەرەتىن كورىنەدى.

فرانتسيالىقتار وتە ۇنەمشىل حالىق، قولىندا بارىمەن عانا كۇن كورەدى. ال اقشاسىن ايامايتىن ءبىر عانا دۇنيە ول - تاماقتانۋ ەكەن.

وڭتۇستىك كورەيا

وڭتۇستىك كورەيادا تۇشكىرگەن ادامعا «ساۋ بول!» دەپ ەشكىم ايتپايدى. تۇشكىرگەن ادام سىپايىلىق ءۇشىن كەشىرىم سۇرايدى دا قويادى، ال وزگەلەر نازار دا سالمايدى.

كارىستەر ءۇشىن ادامنىڭ جاسى وتە ماڭىزدى - تانىسا سالا ولار جاسىڭىزدى سۇراۋى مۇمكىن. وسىعان قاتىستى ارى قارايعى اڭگىمەنىڭ بارىسى انىقتالادى. كورەيادا قازاقستانداعىداي ادامنىڭ جاسىن سىيلايدى، سوندىقتان استى جاسى ۇلكەن ادام جەپ باستايدى ەكەن. سونىمەن قوسا، مۇندا بالالارعا دەگەن ىقىلاس ەرەكشە.