كوروناۆيرۋس پاندەمياسى اياقتالادى - د د س ۇ

استانا. قازاقپارات - دۇنيەجۇزىلىك دەنساۋلىق ساقتاۋ ۇيىمىنىڭ (د د س ۇ) باس ديرەكتورى تەدروس ادانوم گەبرەيەسۋس 2023 -جىلى COVID-19 پاندەمياسى اياقتالاتىنىنا سەنىم ءبىلدىردى.

بۇل تۋرالى ول دەنساۋلىق ساقتاۋ سالاسىنا قوسقان ۇلەسى ءۇشىن كىشى توماس فرەنسيس مەدالىن تاپسىرۋ كەزىندە ايتتى، - دەپ حابارلايدى gazeta.ru سايتى.

«بيىل قانداي دا ءبىر ۋاقىتتا COVID-19، قوعامدىق دەنساۋلىق ساقتاۋ ايماعىنداعى حالىقارالىق الاڭداۋشىلىق تۋدىراتىن توتەنشە جاعداي جانە پاندەميا رەتىندە اياقتالدى دەپ ايتا الاتىنىمىزعا سەنىمدىمىن»، - دەدى گەبرەيەسۋس.

سونىمەن قاتار، د د س ۇ باسشىسى 11-ناۋرىزدا د د س ۇ العاش رەت COVID-19 ىندەتىن پاندەميا دەپ جاريالاعانىنا ءۇش جىل تولعانىن اتاپ ءوتتى. ونىڭ ايتۋىنشا، قازىر الەم «پاندەميا كەزىندەگىدەن الدەقايدا جاقسى جاعدايدا».