قازاقستاندا ءىس جۇزىندە حالىقارالىق زەرتتەۋ باعدارلامالارى جوق - مينيسترلىك

استانا. قازاقپارات - عىلىم جانە جوعارى ءبىلىم مينيسترلىگى «عىلىم قورىنىڭ» قىزمەتىن ترانسفورماتسيالاۋدى ۇسىندى.

بۇل تۋرالى «اشىق» ن ق ا پورتالىندا جاريالانعان «عىلىم جانە تەحنولوگيالىق ساياسات تۋرالى» ق ر زاڭىنىڭ جوباسىنا جازىلعان، دەپ حابارلايدى قازاقپارات ءتىلشىسى.

«قازاقستاندا ءىس جۇزىندە حالىقارالىق زەرتتەۋ باعدارلامالارى جوق. ورناعان حالىقارالىق ىنتىماقتاستىق سونشالىقتى كولەمدى بولماعاندىقتان، كوپتەگەن زەرتتەۋشىلەر مەن ۇيىمدار مۇنداي جوبالار تۋرالى بىلمەيدى جانە قاتىسپايدى. كاسىپورىندار وندىرىسكە عىلىمي- زەرتتەۋ جانە تاجىريبەلىك- كونسترۋكتورلىق جۇمىستار ناتيجەسىندە جاسالعان تاجىريبەلىك ۇلگىلەردى وندىرىسكە ەنگىزۋگە مۇددەلى ەمەس. ويتكەنى بۇل كوبىنەسە قوسىمشا جابدىقتى ساتىپ الۋدى، تەحنولوگيانى يگەرۋدى، قىزمەتكەرلەر قۇرامىن وقىتۋدى، ياعني قولما-قول اقشا قۇيۋدى تالاپ ەتەدى. ال پايدا تابۋعا كەپىلدىك بەرىلمەيدى»، - دەلىنگەن كونسۋلتاتيۆتىك قۇجاتتا.

عىلىمنىڭ دامۋىنا قولبايلاۋ بولىپ وتىرعان بۇل ماسەلەلەرى شەشۋ ءۇشىن مينيسترلىك عىلىم قورىنىڭ قىزمەتىن ترانسفورماتسيالاۋدى جوسپارلاپ وتىر.

«ەكونوميكالىق تيىمدىلىكتى ودان ءارى ارتتىرۋ ماقساتىندا بارلىق بيزنەس- پروتسەستەردىڭ اشىقتىعى مەن مولدىرلىگىن قامتاماسىز ەتەتىن تەتىكتەردى ەنگىزۋ ارقىلى «عىلىم قورى» اكتسيونەرلىك قوعامىنىڭ قىزمەتىن ترانسفورماتسيالاۋ جوسپارلانىپ وتىر. عىلىمي-زەرتتەۋ جانە تاجىريبەلىك- كونسترۋكتورلىق جۇمىستاردى قارجىلاندىرۋدى ىنتالاندىرۋ ماقساتىندا جەكە سەكتور قوسىمشا قۇن سالىعىنان بوساتۋ ۇسىنىلادى. سونىمەن بىرگە يننوۆاتسيالىق ينفراقۇرىلىمنىڭ جاڭادان قۇرىلاتىن ەلەمەنتتەرى ءۇشىن سالىق سالۋدى ازايتۋ سياقتى قوسىمشا جەڭىلدىكتەردى قاراستىرىلادى»، - دەپ ماسەلەنىڭ شەشۋ جولى ۇسىنىلعان.

كونسۋلتاتيۆتىك قۇجات 30-ناۋرىزعا دەيىن كوپشىلىك تالقىلاۋدا بولادى.