وسكەمەندە ۇشەم دۇنيەگە كەلدى
14 ناۋرىز, 07:36

وسكەمەندە ۇشەم دۇنيەگە كەلدى

وسكەمەن. قازاقپارات - وسكەمەن قالاسىندا ۇشەم دۇنيەگە كەلدى، دەپ حابارلايدى قازاقپارات ءتىلشىسى.

ش ق و دەنساۋلىق ساقتاۋ باسقارماسىنىڭ مالىمەتىنە سۇيەنسەك، وسكەمەندەگى انا مەن بالا ورتالىعىندا ۇشەم جارىق دۇنيە ەسىگىن اشتى. بۇل شىعىس قازاقستان وبلىسىنداعى بيىلعى العاشقى ۇشەم.

ۇشەۋى دە قىز. شاقالاقتار شالا تۋىلعاندىقتان اۋەلدە جانساقتاۋ بولىمىنە اۋىستىرىلدى. كەيىن قايتادان پەرزەنتحاناعا جاتقىزىلدى. قىزداردىڭ سالماقتارى – 2540، 2342 جانە 2030 گرام.

«اتا-اناسى بالالارىنا الەنا، مارۋسيا جانە مارينا دەپ ات قويدى. جالپى وڭىردە ۇشەم تۋاتىندار وتە از. سوندىقتان بۇل تەك ءبىر وتباسى ءۇشىن ەمەس، مۇقىم وبلىس ءۇشىن ايتۋلى وقيعا»، - دەيدى انا مەن بالا ورتالىعىنىڭ قىزمەتكەرلەرى.

ايتا كەتەيىك، جالپى شىعىس قازاقستان بويىنشا قاڭتار-اقپان ايلارىندا بارلىعى 1499 نارەستە دۇنيەگە كەلگەن.

اۆتور

تالعاتجان مۇحامەتبەك ۇلى

جاڭالىقتار