سايلاۋ كۇنىندە ماسكا كيۋ ۇسىنىلادى

استانا. قازاقپارات – 19-ناۋرىزدا وتەتىن كەزەكتەن تىس ءماجىلىس جانە ءماسليحاتتار دەپۋتاتتارىن سايلاۋ كەزىندە داۋىس بەرۋشىلەرگە ماسقا كيۋ ۇسىنىلادى.

بۇل تۋرالى دەنساۋلىق ساقتاۋ ۆيتسە- ءمينيسترى - باس مەملەكەتتىك سانيتاريالىق دارىگەر ايجان ەماعامبەتوۆا ايتتى، دەپ حابارلايدى قازاقپارات ءتىلشىسى.

«رەسپۋبليكامىزدا كوروناۆيرۋس ينفەكتسياسى بويىنشا ەپيدەميولوگيالىق جاعداي تۇراقتى. تاۋلىگىنە COVID-19 اۋرۋى ورتاشا ەسەپپەن 100 جاعدايعا دەيىن تىركەلۋدە. ەپيدەميولوگيالىق جاعدايدى باعالاۋ ماتريتساسىنا سايكەس رەسپۋبليكا جانە بارلىق وڭىرلەر «جاسىل» ايماقتا تۇر. سونىمەن قاتار 7 وڭىردە R كورسەتكىشى 1 بىرلىكتەن جوعارى. بۇل اۋرۋدىڭ تارالۋىمەن بايلانىستى بولىپ وتىر. وسىعان وراي، باس مەملەكەتتىك سانيتاريالىق دارىگەردىڭ قاۋلىسىنا سايكەس R كورسەتكىشى 1دەن جوعارى بولعان كەزدە حالىق كوپ جينالاتىن جەرلەردە ماسكا كيۋ ۇسىنىلادى»، - دەدى ايجان ەسماعامبەتوۆا ورتالىق سايلاۋ كوميسسياسىنىڭ وتىرىسىندا.