سوتتالعان ەر ادام بۋرابايعا قاشىپ، جاڭا ءومىر باستاماق بولعان

پەتروپاۆل. قازاقپارات - سولتۇستىك قازاقستان وبلىسىندا ءبىر جىلعا بوستاندىعى شەكتەلگەن تۇرعىن پروباتسيا قىزمەتىنەن قاشىپ، بۋراباي كۋرورتتىق ايماعىندا تىعىلىپ جاتقان، دەپ حابارلايدى قازاقپارات ءتىلشىسى.

س ق و بويىنشا قىلمىستىق-اتقارۋ جۇيەسى دەپارتامەنتى باسپا ءسوز قىزمەتىنىڭ مالىمەتىنشە، پەتروپاۆل قالالىق سوتى ز.- نى ق ر قىلمىستىق كودەكسىنىڭ 188-بابى 1-بولىگى بويىنشا، ياعني ۇرلىق جاساعان ءۇشىن سوتتاپ، ءبىر جىلعا باس بوستاندىعىن شەكتەدى. وسى مەرزىمگە پروباتسيالىق باقىلاۋ بەلگىلەنىپ، جەرگىلىكتى اتقارۋشى بيلىك بەكىتكەن ورىندا 100 ساعات قوعامدىق جۇمىس اتقارۋعا مىندەتتەلدى.

«سوتتالعان پروباتسيا قىزمەتىنە ەسەپكە قويىلعان كەزدە جازاسىن وتەۋگە قاتىستى بارلىق تالاپپەن تانىستى، ونى ورىنداماعان جاعدايدا قانداي شارا قولدانىلاتىنى تۋرالى ەسكەرتىلدى.

ءبىراق، سوعان قاراماستان ول باقىلاۋدان قاشىپ، بەلگىلەنگەن جازادان قۇتىلماق بولدى»، - دەيدى س ق و بويىنشا ق ا ج د قىزىلجار اۋداندىق پروباتسيالىق قىزمەت ءبولىمىنىڭ ينسپەكتورى ۆەرا نيكيتەنكو.

پروباتسيا قىزمەتىنىڭ قىزمەتكەرلەرى باستاپقى ىزدەستىرۋ ءىس-شارالارىن جۇرگىزگەنىمەن، سوتتالعان ادامنىڭ جۇرگەن جەرىن انىقتاۋ مۇمكىن بولمادى. وسىدان كەيىن پروباتسيا قىزمەتىنىڭ ەر ادامعا ىزدەۋ جاريالاۋ تۋرالى ۇسىنىسى قاناعاتتاندىرىلدى.

جەدەل-ىزدەستىرۋ ءىس-شارالارى بارىسىندا سوتتالعان پەتروپاۆل قالاسىندا ۇستالىپ، ۋاقىتشا ۇستاۋ يزولياتورىنا قاماۋعا الىندى.

«سوتتالعان ادام ءوز كىناسىن تولىق مويىندادى. پروباتسيا قىزمەتىنىڭ باقىلاۋىنان قاشىپ، اقمولا وبلىسىنىڭ بۋراباي اۋىلىنا بارىپ قونىستانعان. وسىلايشا، جاساعان قىلمىسىن جانە ونىڭ سالدارىن ۇمىتىپ، جاڭا ءومىر باستاماق بولعان.

جازانى وتەۋ كەزىندە ول ءتيىستى تالاپتاردى ورىنداماعانى ءۇشىن جازانىڭ باس بوستاندىعىنان ايىرۋعا اۋىستىرىلۋى مۇمكىندىگى تۋرالى ەكى رەت جازباشا ەسكەرتۋ الدى. سوتتالعاننىڭ ءىسىن قىزىلجار اۋداندىق سوتى قارايدى»، - دەيدى ۆەرا نيكيتەنكو.